انتشار اور تعمیر

انتشار اور تعمیر عین اس وقت جب پاکستان میں موسمیاتی تبدیلیوں کے سبب ملک کی آبادی کا ایک تہائی سیلاب کی زد میں تھا، آئی ایم ایف کے بورڈ اجلاس سے پہلے پی ٹی آئی کی خیبر پختون خواہ حکومت کے وزیر خزانہ نے پاکستان کی آئی ایم ایف سے ڈیل کو سبوتاژ کرنے کی کوشش کرتے ہوئے پی ٹی آئی کی سابقہ حکومت کے وزیر خزانہ شوکت ترین کے کہنے پر ایک خط لکھا جس میں کہا گیا تھا کہ وہ سرپلس دینے سے قاصر ہوں گے جس کا وہ پہلے وعدہ کر چکے تھے۔ اسی دن دوپہر کو تمام نیشنل میڈیا ان خفیہ کالوں سے گونج رہا تھا جس میں شوکت ترین پنجاب اور کے پی کے کے وزرا خزانہ کو فون کر کے گائیڈ کر رہے تھے کہ وہ خط لکھیں تاکہ اس حکومت کو سبق سکھایا جا سکے جو پی ٹی آئی کے چئیرمین کو تنگ کرنے پر تلی ہوئی ہے۔ انہیں یہ مسئلہ نہیں تھا کہ اس سے ریاست نقصان اٹھائے گی بلکہ وہ حکومت کو سبق سکھانے پر تلے نظر آئے۔ لیکن رات آنے تک آئی ایم ایف اپنے بورڈ اجلاس میں ڈیل کی منظوری دے چکا تھا۔ پاکستان میں غیرمعمولی مون سون بارشوں اور برفانی گلیشئیر پگھلنے کی وجہ سے آنے والے تباہ کن سیلاب نے اب تک 1,000 سے زیادہ افراد کو ہلاک کیا ہے اور لاکھوں گھر اور لاکھوں ایکڑ فصلوں کو تباہ کیا ہے، جس سے 30 ملین سے زیادہ پاکستانی متاثر ہوئے ہیں اور اربوں ڈالر کا نقصان ہوا ہے۔ ملک بھر میں بارش اوسط سے تقریباً تین گنا زیادہ اور صوبہ سندھ جیسے سب سے زیادہ متاثرہ علاقوں میں، پانچ گنا زیادہ ہوئی ہے۔ ایسوسی ایٹڈ پریس کے مطابق پاکستان کا شمار ان ممالک میں ہوتا ہے جہاں موسمیاتی تبدیلیوں کا سب سے زیادہ خطرہ ہے۔ اسے عالمی اوسط سے کافی زیادہ گرمی کی شرح اور ممکنہ طور پر زیادہ، بار بار اور شدید موسمیاتی واقعات کا سامنا ہے۔ یہ واقعات خاص طور پر پسماندہ اور خطرے سے دوچار آبادیوں کے لیے خطرہ ہیں، بشمول بوڑھے، معذور افراد، غربت میں مبتلا افراد، اور دیہی آبادی۔ پاکستان کے تباہ کن سیلاب ایک گہرے معاشی بحران کے درمیان آئے ہیں۔ اس کے 230 ملین میں سے چالیس فیصد لوگوں کو 2020 میں غذائی عدم تحفظ کا سامنا تھا، اس کے باوجود صرف 8.9 ملین خاندانوں کو مہنگائی کے اثرات کو کم کرنے کے لیے امداد ملی۔ غربت دیہی علاقوں میں مرکوز ہے، خاص طور پر سیلاب سے سخت متاثر علاقوں میں۔ بین الاقوامی مالیاتی فنڈ (IMF) کے بورڈ نے 29 اگست کو میٹنگ کی اور، پاکستانی حکام کے مطابق، جولائی 2019 میں منظور شدہ رکے ہوئے قرض پروگرام کو بحال کرنے اور پاکستان کی آبادی پر معاشی بحران کے کچھ بوجھ کو کم کرنے کے لیے تقریباً 1.17 بلین امریکی ڈالر کی تقسیم کا فیصلہ کیا۔ حالیہ سیلاب کی وجہ سے ہونے والی تباہی کو مدنظر رکھتے ہوئے، حکومت کو فنڈز کی آمد کو متاثرہ لوگوں کی مدد کو بڑھانے کے لیے استعمال کرنا چاہیے اور IMF کو اس بات کو یقینی بنانا چاہیے کہ اس کے پاس پائیدار، جامع اور حقوق پر مبنی بحالی کے لیے وقت اور لچک ہو۔ سیلاب کے بعد کی صورتحال کے بارے میں نیوز اور جنگ کے معاشی تجزیہ نگار مہتاب حیدر لکھتے ہیں کہ بین الاقوامی مالیاتی فنڈ (آئی ایم ایف) نے رواں مالی سال کیلئے پاکستان کیلئے 3.5 فیصد کی کم جی ڈی پی کی شرح نمو اور اوسطاً 19.9 فیصد مہنگائی کے ساتھ ’جمود‘ کی پیش گوئی کی تھی۔ اس نسخے سے آئی ایم ایف کی سخت شرائط کے تحت پاکستان میں بے روزگاری اور غربت میں اضافہ ہونا لازمی ہے۔ ایسا کوئی نسخہ دستیاب نہیں ہے کہ جون 2023 میں موجودہ پروگرام کی میعاد ختم ہونے کے بعد کاؤنٹی آئی ایم ایف پروگرام سے باہر آجائے گی۔ اگر جون 2023 کے آخر تک زرمبادلہ کے ذخائر 16.2 ارب ڈالرز کی مطلوبہ سطح تک نہ بڑھ سکے تو ملک کو ایک اور آئی ایم ایف پروگرام کی ضرورت ہو گی۔ یاد رہے کہ آئی ایم ایف کے یہ تجزیہ جات سیلابی صورتحال سے پہلے کے ہیں اور موجود وسائل اور سیلاب کے بعد کی صورتحال میں ان میں اضافے کی توقع ہے اس معاشی اور سماجی بحران میں سوشل میڈیا ایکٹیوسٹ عظمت افروز خان کا خیال ہے کہ "خان اب تک کئی ریڈ لائنز کراس کر چکے ہیں جن میں شہباز گل کی بلاوجہ مداخلت اور تازہ ترین آئی ایم ایف ڈیل کو سبوتاژ کرکے ریاست کو نقصان پہنچانے کی کوشش۔ ان کے خیال میں اس میں کوئی شک نہیں کہ خان صاحب ہر ادارے میں تقسیم پیدا کرنے کوشش کر کے اس تقسیم کا فائدہ اٹھانے کی کوشش کرتے ہیں مگر اب شاید ریاست اب اس سلسلے کو مزید برداشت نا کر سکے۔" کیا آپ تصور کر سکتے ہیں کہ اگر آئی ایم ایف کی ڈیل کو ڈی ریل کرنے کی کوشش کامیاب ہو جاتی تو موجودہ سیلابی کیفیت میں حکومت ایک اندھیری گلی میں کیسے کھڑی نظر آتی جو ڈیفالٹ سامنے دیکھ رہی ہو ؟ میں نے گزشتہ کالم میں گزارش کی تھی کہ انتشار کی سیاست نا تو ٹرمپ کو راس آئی ہے اور نا ہی عمران خان صاحب کو راس آئے گی۔ کیونکہ ریاستیں انتشار نا افورڈ کیا کرتی ہیں اور نا ہی برداشت۔ شوکت ترین کی کالز کا منظر عام پر آنا بتاتا ہے کہ بجنے والی گھنٹیاں کہیں نا کہیں سن لی گئی ہیں۔ مستقبل کے لائحہ عمل کیلئے ایک اور سوشل میڈیا ایکٹیوسٹ اور متعدد این جی اوز سے تعلق رکھنے والے خالد سیف اللہ جو آج کل جاپان انٹرنیشنل کوآپریشن ایجنسی سے منسلک ہیں، کا خیال ہے کہ "تحریک انصاف اگر اپنی بقا چاھتی ھے اور اس ملک کے سیاسی منظر نامے پہ اپنا وجود برقرار رکھنا چاھتی ھے تو اسے تنگ نظری کی سیاست پہ نظر ثانی کر نا ھو گی۔ اور سمجھنا ھو گا کہ ان آڈیو لیکس کا نتیجہ تحریک انصاف کے سیاسی مستقبل کیلیے کتنا نقصان دہ ہو سکتا ھے۔ خان صاحب کیلئے ابھی بھی موقع ھے کہ سیاسی تنہائی سے نکلیں اور دوسری سیاسی قوتوں کے ساتھ مذاکرات کا راستہ اختیار کر کے ملک کی بہتری کی سوچ اپنائیں۔ میثاق معیشت ہی اس ملک کی ترقی کا واحد حل ھے اگر تمام اسٹیک ہولڈرز بیس سے پچیس سال کے کسی بھی منصوبے پہ اتفاق کر لیں اور مل بیٹھ کر اس ملک کے معاشی مستقبل پر سیاست نہ کرنے کا عہد کرلیں تو معاشی خوشحالی کے نتیجہ میں سیاسی نظام میں خلل کا راستہ بھی روکا جا سکتا ہے۔ لیکن اس کیلیے ریاست کے تمام ستونوں کو مل بیٹھ کر کچھ سخت فیصلے کرنا ھوں گے۔"

انتشار کی سیاست

عین اس وقت جب سابق صدر ڈونلڈ ٹرمپ کے فلوریڈا کے گھر کی ایف بی آئی کی تلاشی کے تناظر میں، کچھ انتہائی دائیں بازو کی شخصیات آن لائن پرتشدد بیان بازی کر رہی ہیں اور وہاں ایک اور قسم کی سول وار کے خطرات کے بارے میں وہاں کے ماہرین سیاست تجزئے کر رہے ہیں اسی ہفتے پاکستان میں عمران خان کی گرفتاری کے خدشے نے ان کے ورکرز کو انکی رہائش گاہ بنی گالا پر اکٹھا ہونے پر مجبور کیا اور وہ کھلم کھلا عمران خان ہماری ریڈ لائن ہے کے ہیش ٹیگ کے ساتھ ٹرینڈ چلا رہے ہیں جو اب تک ٹوٹر پر ٹاپ میں سے ایک ٹرینڈ ہے آئیے، دیکھتے ہیں کہ امریکہ میں کیا ہو رہا ہے۔ بزنس انسائیڈر کی حالیہ اشاعت میں اس پر روشنی ڈالی گئی ہے: ریپبلکن پارٹی نے طویل عرصے سے خود کو "امن و امان" کے محافظ کے طور پر پیش کیا ہے، لیکن ٹرمپ کے گھر چھاپے کے نتیجے میں ریپبلکن قانون ساز مارجوری ٹیلر گرین نے FBI کو نشانے پر لے لیا ہے۔ انہوں نے سوشل میڈیا پر "سول وار" کا حوالہ بھی دیا۔ کیونکہ ان کے ریپبلکن ساتھی ایف بی آئی کا موازنہ گیسٹاپو سے کرتے ہیں اور چھاپے کو اس طرح کی چیز کے طور پر پیش کرتے ہیں جو صرف "تیسری دنیا" کے ممالک میں ہوتا ہے۔ یاد رہے کہ ٹرمپ/ ریپبلکن پارٹی کے لاکھوں ووٹرز اس غلط تصور پر یقین کرتے رہتے ہیں کہ 2020 کے صدارتی انتخابات ٹرمپ سے چوری کیے گئے تھے۔ انہوں نے پچھلے سال 6 جنوری کو امریکی کیپیٹل میں مہلک فسادات کو متحرک کیا تھا، اور تاریخ دان اور جمہوریت کے ماہرین نے خبردار کیا ہے کہ یہ جھوٹ مزید تشدد کے امکانات کو فروغ دے رہے ہیں۔ ان کا یہ بھی کہنا ہے کہ اگر امریکہ نے خانہ جنگی دیکھی تو یہ پہلی جیسی نہیں ہوگی۔ فیونا ہل، جنہوں نے ٹرمپ انتظامیہ کے دوران قومی سلامتی کونسل میں روس کے سرکردہ ماہر کے طور پر خدمات انجام دیں، نے گزشتہ ماہ انسائیڈر کے ساتھ بات چیت میں کہا تھا کہ ملک ایک ایسے موڑ پر ہے جہاں "مختلف برادریوں اور حکام پر اعتماد" اس حد تک ختم ہو گیا ہے کہ لوگ صرف ایک دوسرے سے لڑنا شروع کر دیتے ہیں۔ ٹرمپ کے گھر پر چھاپے کے ایک ہفتے سے بھی کم وقت بعد، ایک مسلح شخص نے سنسناٹی میں ایف بی آئی کے فیلڈ آفس میں گھسنے کی کوشش کی۔ حکام نے کسی مقصد کا اعلان نہیں کیا ہے لیکن مبینہ طور پر اس بات کی تحقیقات کر رہے ہیں کہ آیا اس شخص نے جو بالآخر پولیس کے ہاتھوں مارا گیا تھا کا انتہائی دائیں بازو کی انتہا پسندی سے تعلق تھا۔ ایسا لگتا ہے کہ مشتبہ بندوق بردار رکی شیفر نے ٹرمپ کے سوشل میڈیا نیٹ ورک ٹروتھ سوشل پر ایف بی آئی کے خلاف جنگ اور تشدد کی کال پوسٹ کی تھی۔ سان ڈیاگو کی یونیورسٹی آف کیلیفورنیا میں پولیٹیکل سائنس کی پروفیسر باربرا ایف والٹر نے جو سیاسی تشدد پڑھانے میں مہارت رکھتی ہیں، نے پوسٹ کو بتایا، "جب لوگ خانہ جنگی کے بارے میں سوچتے ہیں، تو وہ پہلی خانہ جنگی کے بارے میں سوچتے ہیں۔ اور ان کے ذہن میں، دوسری جنگ کی طرح نظر آئے گی۔ اور ظاہر ہے کہ ایسا بالکل نہیں ہے،" والٹر نے پوسٹ کو بتایا۔ "ہم جس چیز کی طرف بڑھ رہے ہیں وہ ایک شورش ہے، جو کہ خانہ جنگی کی ایک شکل ہے۔ یہ خانہ جنگی کا 21 ویں صدی کا ورژن ہے، خاص طور پر ان ممالک میں جہاں طاقتور حکومتیں اور طاقتور فوجیں ہیں، جیسا کہ امریکہ ہے۔ " واشنگٹن پوسٹ نے بدھ کو رپورٹ کیا کہ وائٹ ہاؤس میں ایک حالیہ ملاقات کے دوران، تاریخ دانوں کے ایک گروپ نے صدر جو بائیڈن کو خبردار کیا کہ امریکہ کو ایسے خطرات کا سامنا ہے جو خانہ جنگی سے پہلے کے دور میں ملک نے دیکھے ادھر اپنے ملک میں دیکھئے تو ٹائم کی تازہ رپورٹ کے مطابق: یونیورسٹی آف ویسٹرن آسٹریلیا میں سنٹر فار مسلم سٹیٹس اینڈ سوسائٹیز کی ڈائریکٹر ثمینہ یاسمین کہتی ہیں کہ مرکزی دائیں بازو کی مسلم لیگ (ن) پارٹی کے وزیر اعظم شہباز شریف کی نئی حکومت نے جو خان کے دیرینہ دشمن نواز شریف کے بھائی ہیں، نے خان کو "ہسٹیریا بڑھانے" کی اجازت دینے کی غلطی کی ہے۔ لیکن اب اناڑی طریقے سے کریک ڈاؤن کرکے "اور بھی عدم استحکام" کا سامنا ہے۔" پاکستانی معاشرہ شاذ و نادر ہی اس قدر پولرائزڈ ہوا ہے، جس میں آدھا ملک خان کو نجات دہندہ اور آدھا شیطان کا اوتار سمجھتا ہے۔ یاسمین کہتی ہیں، ’’مؤثر طریقے سے، اس نے جو کچھ کیا اس سے ملک تقسیم ہو گیا ہے۔ یہ بہت زیادہ ٹرمپ کی طرح ہے [امریکہ میں] اور اگر امریکہ ابھی تک مکمل طور پر ٹھیک نہیں ہوا تو پاکستان جیسا ملک کیسے سنبھل سکتا ہے؟" میں کہتا رہا ہوں کہ عمران خان اور امریکی ریپبلیکن پارٹی/ ٹرمپ کے درمیان مکمل ذہنی ہم آہنگی ہے اور دونوں کے انداز سیاست کا رنگ اس وقت نظر آیا جب خان نے اپنی پارٹی میں امریکی رائٹ ونگ گروپ پراوڈ بوائز کی طرز پر ٹائیگر فورس کی تشکیل کرنی شروع کی۔ یاد رہے کہ یہی پراوڈ بوائز تھے جو امریکی کیپیٹل ہل پر حملے میں پیش پیش تھے۔ اور اب جبکہ خان نے امریکہ میں ایک نئی پی آر او کمپنی کی خدمات حاصل کی ہیں انٹر نیشنل کمیونٹی میں ایک نئی کمپین کی توقع ہے جس کا آغاز اقوام متحدہ سے بیان، موقر جریدوں میں آرٹیکلز اور ٹوٹر پیغامات کی صورت میں ہو چکا ہے۔ کیا کہیں گھنٹیاں بج رہی ہیں ؟

خوش رہنے کا ہنر

اگست 2016 میں، میں فیروز پور روڈ لاہور پہ واقع اپنے دفتر سے نکلا تو مجھے نہیں معلوم تھا کہ اس دن میری زندگی بدلنے والی ہے۔ میں ان دنوں اپنی کمپنی کیلئے کچھ اہم پوزیشنز پر ہیڈ ہنٹنگ کر رہا تھا اور مجھے ایک اہم پوزیشن کو فل کرنے کیلئے اس شام ایک صاحب سے ملاقات کرنی تھی۔ پاک عرب سوسائیٹی سے ان سے مل کر نکلا تو رات کے 8 بج چکے تھے۔ گھر پہنچا تو لوڈ شیڈنگ کی وجہ سے بجلی بند تھی جبکہ میں گاڑی میں مسلسل اے سی میں ہونے کی وجہ سے اس چکر میں تھا کہ گرمی میں کیسے ٹائم گزرے تو اپنے ساتھی کو باہر سے ہی فون کر کے بلا لیا کہ چلو کچھ کھا کر واپس آتے ہیں اتنی دیر میں بجلی بھی آ جائے گی۔ خیر وہاں سے ایک لانگ ڈرائیو اور کھانا کھا کر قینچی امر سدھو کے ایل شیپ ٹرن پر پہنچے تو فروٹ کی ریہڑیوں پر رک گئے۔ اب جو لوگ لاہور سے واقف ہیں انہیں اچھی طرح اس اسپاٹ کا معلوم ہے کہ یہاں ٹریفک اور پیدل چلنے والوں کا کتنا ہجوم ہوتا ہے اور یہ کتنی پر ہجوم جگہ ہے۔ خیر میں نے گاڑی روکی اور اپنے ساتھی کو پرس سے پیسے نکال کر کچھ فروٹس لینے کیلئے کہا۔ پرس آلسی میں ڈیش بورڈ پر رکھا جہاں موبائل پہلے پی پڑا تھا اور سیٹ سے سر ٹکا کر دن بھر کی تھکن مٹانے کو آنکھیں موندی ہی تھیں کہ میری سائیڈ کی کھڑکی کا شیشہ بجا۔ سستی میں ادھر گردن موڑی۔ میرا خیال تھا کہ کوئی مانگنے والا ہے لیکن جیسے ہی گردن مڑی تو ایک پستول بردار پر نظر پڑی اور ایک اشارہ کہ شیشہ نیچے کرو۔ سمجھ آ گئی کہ جناب ان ڈاکو صاحبان کے نشانے پر آ ہی گئے ہیں جنکے قصے بہت سارے دوست سنا چکے تھے۔ میکانکی انداز میں شیشہ نیچے کیا اور انتہائی دوستانہ انداز میں اسے کہا کہ جی باو جی کیا چاہئیے ؟ جواب ملا کہ پرس اور موبائل۔ اچھا یاد دلا دوں کہ میرے پاس ہمیشہ سے ہی دو موبائل رہے ہیں ایک گھر اور پرسنل استعمال کیلئے اور دوسرا آفیشل کالوں کیلئے۔ ایک ڈیش بورڈ پہ دھرا تھا اور دوسرا جیب میں۔ خیر اسے جیب والا سب سے پہلے دیا اور جیسے ہی ڈیش بورڈ سے دوسرا موبائل اور پرس اٹھانے کو ڈیش بورڈ کی طرف ہاتھ بڑھایا اس بھائی کو جانے کیا سوجھی کہ یکدم فائر کی آواز آئی، شیشہ ٹوٹنے اور جسم میں دھکا لگنے کی کیفیت محسوس کی اور میں ساتھ والی سیٹ پر گر سا گیا۔ اب اس سیدھا ہونے کے مرحلے میں ہی ہمیں پتا چل گیا تھا کہ ہمیں گولی لگ چکی ہے۔ خیر باہر نکلے تو سب سے پہلے سینے اور پھر سر کو ٹٹولنے کی کوشش کی تو دائیں بازو نے ہلنے سے انکار کیا اور ایک ٹیس سے اٹھی۔ بائیں ہاتھ سے ٹٹولا تو پتا چلا کہ گولی کندھے میں دھنس چکی ہے۔ اتنے میں لوگ جمع ہونے شروع ہوئے میرا ساتھی بھی بھاگ کر آیا اور میں نے اسے بتایا کہ موبائل اسنیچر گولی مار کر بھاگ گیا ہے۔ تم بجائے ایمبولینس بلانے کے گاڑی چلاو اور نزدیکی جناح ہسپتال میں چلو۔ خیر اگلے چند لمحوں میں ہم جناح کے ایمرجنسی سرجیکل یونٹ میں تھے اور ہمارا گولی نکالنے کیلئے آپریشن ہوا تو سرجن نے بتایا کہ گولی کندھے میں لگی اور ٹریول کر کے کمر سے نکلی اور شکر ہے کہ ڈھائی سنٹی میٹر کے فاصلے سے پھیپھڑے بچ گئے کیونکہ ڈھائی سنٹی میٹر دور سے گولی نے راستہ بدل دیا۔ یقین مانیں ان ڈھائی سنٹی میٹرز نے ہماری زندگی بدل دی۔ اس آپریشن کے بعد ہمارے مزید کئی آپریشن ہوئے کیونکہ کندھے کی ہڈی کرچی کرچی ہو چکی تھی۔ اور کئی وریدیں ڈیمیج ہوئی تھیں بازو بے جان تھا اور اسے کام میں لانے کیلئے بہت مدت درکار تھی۔ بازو میں راڈ ڈالی گئی، اور ہم کئی ماہ بستر کے ہو گئے۔ زخم کو بھرنے اور بازو کو اس قابل بنانے میں کہ یہ کام کرے مزید 6 ماہ لگے لیکن ان دنوں میں ہمیں سوچنے اور زندگی کے بارے میں غور کرنے کا جو نادر موقع ملا اس کو میں اپنی زندگی کا ایک ٹرننگ پوائینٹ سمجھتا ہوں۔ زندگی دکھوں اور خوشیوں کا ایک مجموعی پیکیج ہے۔ آپ ہر وقت خوش بھی نہیں رہ سکتے اور نا ہی ہر وقت ناخوش۔ لیکن آپ کیسے اپنے اندر سے خوشی نچوڑ سکتے ہیں اس پر میری زندگی کے تجربات کے بعد ایک نظریہ ہے جو میں سادہ الفاظ میں بیان کرنے کی کوشش کروں گا۔ خوشی بہت سے لوگوں کے لئے ایک جیسی نہیں ہوتی بلکہ ہر انسان کی خوشی کا پیمانہ مختلف ہوتا ہے۔ سب سے پہلے وقت نکالئے اور اپنے ساتھ مانوس ہونے میں اسے خرچ کیجئے۔ خود کو جاننا اور قبول کرنا کہ آپ کون ہیں خود شناسی کہلاتا ہے۔ اپنی ذات سے تعلق رکھئے خود سے محبت کرنا سیکھئے اور خود کو جس حالت میں ہیں اسے قبول کیجئے۔ یہ مرحلہ سب سے اہم ہے۔ دوسری بات سمجھنے کی یہ ہے جو شخص صرف اپنے لیے جیتا ہے وہ نادان اور عموماً دکھی ہوتا ہے۔ آپ کا کردار اور بے داغ ضمیر پائیدار خوشی کے لیے اہم ہیں۔ ماضی میں کی گئی غلطیوں کے احساس کے لیے توبہ اور اپنے آپ کو معاف کر دینے سے خود کو معافی ملنا اور اسے محسوس کرنا احساس گناہ سے آزادی کا گہرا احساس دیتا ہے۔ لہذا، ہم نے جو بھی غلطیاں کی ہیں اسے درست کرنے اور کسی سے بھی خراب تعلقات کو حل کرنے کی ضرورت ہے۔ ہمیں نہ صرف اپنے جیسے کسی انسان سے معافی مانگنے میں کوئی عار نہیں ہونی چاہئیے بلکہ خدا سے توبہ میں بھی۔ جب ہم اللہ کے سامنے اپنے گناہوں اور غلطیوں کا اعتراف کرتے ہیں، تو وہ ہمیشہ ہمیں معاف کرتا ہے۔ اس کے بعد پھر ہمیں اپنے آپ کو معاف کرنے کی بھی ضرورت ہے۔ یاد رکھیں، خوشی ایک عمل ہے واقعہ نہیں۔ تندہی سے عمل کی پیروی کریں اور خوشی/ اطمینان کا احساس بھرپور انعام ہوگا۔ خوشی کا دوسرا مطلب یہ بھی ہے کہ اپنے ذاتی حالات کو قبول کرنا سیکھیں۔ ان میں سے کچھ کو تبدیل کیا جا سکتا ہے لیکن آپ تمام معاملات تبدیل نہیں کر سکتے۔ جب تک آپ ان معاملات کو قبول نہیں کرتےجو تبدیل نہیں ہوسکتے، آپ کبھی خوش یا مطمئن نہیں رہیں گے۔ جیسا کہ نابینا ہیلن کیلر نے کہا، "میں اپنی معذوری کے لیے خدا کا شکر ادا کرتی ہوں، کیونکہ ان کے ذریعے میں نے اپنے آپ کو، اپنے کام کو اور اپنے خدا کو پایا ہے۔" اسکے بعد کا مرحلہ اپنے ارد گرد اور اپنے رشتوں کی قدر کرنا ہے۔ رشتے درختوں کی مانند ہوتے ہیں بعض اوقات ہم اپنی ضرورتوں کی خاطر انہیں کاٹتے چلے جاتے ہیں اورآخر کار خود کو گھنے سائے سے محروم کر دیتے ہیں۔ رشتے اور دوستی نبهانے کیلئےوعدوں اور قسموں کی ضرورت نہیں صرف دو خوبصورت دلوں کی ضرورت ہوتی ہے نمبر ایک اعتماد والا دل اور دوسرا احساس والا دل۔ سچے رشتے اور سچے دوست خوشیوں میں زینت اور دکھوں میں سہارا ہوتے ہیں پروردگار کی نعمتوں میـں سے ایک نعمت محبت کرنے اور سمیٹنےکی خوبی ہے- کیونکہ یہ خوبی انسانی رشتوں میــــں بگاڑ کو روکتی ہے- آسانیاں بانٹیئے، خوشیاں پائیے

امام حسین - امام شہدا

ابو عبد اللہ الحسین ابن علی ابن ابی طالب- 10 جنوری 626 - 10 اکتوبر 680، جنہیں حسین ابن علی یا امام حسین کے نام سے بھی جانا جاتا ہے، پیغمبر اسلام محمد مصطفی صلی اللہ علیہ و آل محمد کے نواسے تھے۔ حضرت علی ابن ابی طالب و محمد مصطفی صلی اللہ علیہ و آل وسلم کی بیٹی فاطمہ الزہراہ کے بیٹے اور ساتھ ساتھ امام حسن ابن علی کے چھوٹے بھائی۔ عابدین۔ انہیں اہل بیت کے ساتھ ساتھ اہل الکیسہ کا رکن بھی سمجھا جاتا ہے، اور وہ مباہلہ کی تقریب میں بھی شریک تھے۔ پیغمبر اسلام محمد مصطفی صلی اللہ علیہ و آل وسلم نے امام حسین اور ان کے بھائی امام حسن کو "جنت کے نوجوانان کے سردار" کا لقب دیا ہے[9][10] ابتدائی زندگی روایات کے مطابق، امام حسین 5 شعبان 4 ہجری (10 جنوری 626 عیسوی) کو مدینہ منورہ میں پیدا ہوئے اور ابھی بچے ہی تھے کہ ان کے دادا محمد مصطفی صلی اللہ علیہ و آل وسلم کا انتقال ہو گیا۔[17] وہ امام علی المرتضی کے چھوٹے بیٹے تھے، جو حضرت محمد صلی اللہ علیہ و آل وسلم کے چچازاد بھائی تھے، اور انکی والدہ فاطمہ الزہراہ، حضرت محمد صلی اللہ علیہ و آل وسلم کی بیٹی، دونوں قریش کے قبیلہ بنو ہاشم سے تھے۔[18] حسن اور حسین دونوں کا نام محمد مصطفی صلی اللہ علیہ و آل وسلم نے رکھا تھا، حالانکہ حضرت علی المرتضی کے ذہن میں "حرب" جیسے دوسرے نام بھی تھے۔ امام حسین کی ولادت کا جشن منانے کے لیے، حضرت محمد صلی اللہ علیہ و آل سلم نے ایک مینڈھے کی قربانی دی، اور حضرت فاطمہ الزہراہ نے اپنا سر منڈوایا اور اپنے بالوں کے برابر وزن چاندی میں بطور صدقہ دیا۔[19] روایات کے مطابق، امام حسین کا ذکر تورات میں "شبیر" اور انجیل میں "تب" کے نام سے ہوا ہے۔ حضرت موسیٰ کے بھائی حضرت ہارون نے اپنے بیٹوں کے وہی نام رکھے جو اللہ نے حضرت علی المرتضی کے بچوں کے لیے چنے تھے۔[20] امام حسین کی پرورش سب سے پہلے محمد مصطفی صلی علیہ و آل وسلم کے گھرانے میں ہوئی تھی۔ حضرت علی المرتضی اور حضرت فاطمہ الزاہراہ کی شادی سے بننے والے خاندان کی حضرت محمد مصطفی صلی اللہ علیہ و آل وسلم نے کئی بار تعریف کی۔ مباہلہ اور حدیث اہل کسیہ جیسے واقعات میں حضرت محمد مصطفی صلی اللہ علیہ و آل وسلم نے اس خاندان کو اہل بیت کہا ہے۔ قرآن کریم میں بہت سی سورتوں میں، جیسے آیت تزکیہ میں، اہل بیت کی تعریف کی گئی ہے[21]۔ تاریخ نویس میڈلونگ جو ایک جرمن سکالر ہیں کے مطابق، حسن اور حسین سے حضرت محمد مصطفی صلی اللہ علیہ و آل وسلم کی محبت کو ظاہر کرنے والی متعدد روایات ہیں، جیسے کہ انہیں اپنے کندھوں پر اٹھانا، یا اپنے سینے پر رکھنا اور پیٹ پر بوسہ دینا۔ میڈیلونگ کا خیال ہے کہ ان میں سے کچھ روایات اس بات کی نشاندہی کرتی ہیں کہ حسن اپنے دادا سے زیادہ مشابہت رکھتے تھے۔ اس قسم کی دوسری احادیث یہ ہیں: "جس نے ان سے محبت کی اس نے مجھ سے محبت کی اور جس نے ان سے بغض رکھا اس نے مجھ سے بغض رکھا" اور "الحسن و الحسین جنت کے جوانوں کے سید ہیں"۔ یہ بھی روایت ہے کہ حضرت محمد صلی اللہ علیہ و آل وسلم نے حضرت علی المرتضی، حضرت فاطمہ الزاہراہ، امام حسن اور امام حسین کو اپنی چادر کے نیچے لے لیا اور انہیں اہل بیت کہا اور کہا کہ وہ ہر قسم کے گناہ اور آلودگی سے پاک ہیں۔ حضرت محمد مصطفی صلی اللہ علیہ و آل وسلم نے کئی مواقع پر واقعہ کربلا کی اطلاع دی۔ مثال کے طور پر، انہوں نے حضرت ام سلمہ کو مٹی کی ایک چھوٹی سی بوتل دی اور بتایا کہ امام حسین کے قتل کے بعد بوتل کے اندر کی مٹی خون میں بدل جائے گی۔[23] مباہلہ کا واقعہ 10 ہجری (631-632) میں نجران (جو اب شمالی یمن میں ہے) سے ایک عیسائی ایلچی حضرت محمد مصطفی صلی اللہ علیہ و آل وسلم کے پاس آیا، اس بحث کے لیے کہ دونوں فریقوں میں سے کس نے حضرت عیسیٰ کے بارے میں اس کے نظریے میں غلطی کی ہے۔ حضرت عیسیٰ علیہ السلام کی معجزانہ پیدائش کو آدم کی تخلیق سے تشبیہ دینے کے بعد — جو نہ تو کسی ماں کے ہاں پیدا ہوا تھا اور نہ ہی کسی باپ سے — اور جب عیسائیوں نے عیسیٰ کے بارے میں اسلامی نظریے کو قبول نہیں کیا تو حضرت محمد مصطفی صلی اللہ علیہ و آل وسلم کو ایک وحی موصول ہوئی جس میں انہیں عیسائیوں کو مباہلہ میں بلانے کی ہدایت کی گئی تھی، جہاں ہر فریق خدا سے دعا کرتا کہ وہ جھوٹی جماعت اور ان کے خاندانوں کو تباہ کر دے:[24][25][26] اگر کوئی آپ کے پاس اس علم کے آنے کے بعد [عیسیٰ کے بارے میں] آپ سے جھگڑا کرے تو کہو: آؤ ہم اپنے بیٹوں اور آپ کے بیٹوں کو، اپنی عورتوں کو اور آپ کی عورتوں کو، اپنے آپ کو اور آپ کو بلائیں، پھر ہم قسم کھائیں اور جھوٹ بولنے والوں پر خدا کی لعنت ہو (قرآن 3:61) [24] آیت "خدا صرف یہ چاہتا ہے کہ تم سے داغ دھل جائے، اہل خانہ، اور تمہیں بالکل پاکیزہ بنائے" بھی اسی واقعہ کی طرف منسوب ہے، جس میں حضرت علی المرتضی، حضرت فاطمہ الزاہراہ، امام حسن اور امام حسین حضرت محمد مصطفی صلی اللہ علیہ و آل وسلم کی چادر کے نیچے کھڑے تھے۔ (اہل بیت)[25] ] اس طرح لقب اہل بیت، چادر کا خاندان، بعض اوقات مباہلہ کے واقعہ سے متعلق ہوتا ہے۔[e][28]24 ذی الحجہ کی صبح حضرت محمد مصطفی صلی اللہ علیہ و آل وسلم مقررہ وقت پر نکلے۔ وہ اپنے خاندان کے صرف منتخب افراد کو لے کر آئے تھے، امام حسین کو اپنے بازو میں اٹھائے ہوئے، امام حسن نے ہاتھ پکڑ رکھا تھا، اس کے بعد حضرت فاطمہ الزاہراہ اور حضرت علی المرتضی تھے۔ روایت کے مطابق عیسائی حیران رہ گئے جب انہوں نے حضرت محمد مصطفی صلی اللہ علیہ و آل وسلم کے خاندان ("علی، فاطمہ، حسن اور حسین") کو حضرت محمد مصطفی صلی اللہ علیہ و آل وسلم کے ساتھ دیکھا۔عیسائیوں نے تحفظ کے بدلے میں حضرت محمد مصطفی صلی اللہ علیہ و آل وسلم کو خراج تحسین پیش کرتے ہوئے امن کی درخواست کی۔ ام سلمہ نے حدیث الکسا کے ابتدائی نسخہ[1] میں بیان کیا ہے کہ حضرت محمد صلی اللہ علیہ و آل وسلم نے حضرت علی المرتضی ، حضرت فاطمہ الزاہراہ، امام حسن اور امام حسین کو اپنی چادر کے نیچے جمع کیا، [2][3] ان پانچوں کو اہل بیت کے نام سے جانا جاتا ہے۔ -کسا ('چادر کے لوگ')۔[4] حدیث جاری ہے کہ حضرت محمد مصطفی صلی اللہ علیہ و آل وسلم نے دعا کی، "اے خدا، یہ میرے اہل بیت (میرے گھر کے لوگ) ہیں اور میرے قریبی رشتہ دار ہیں، ان سے ناپاکی کو دور کر اور ان کو مکمل طور پر پاک کر دے،" قرآن کی آیت 33:33 [2][3] جسے آیت تزکیہ کے نام سے بھی جانا جاتا ہے۔ دوسروں کے علاوہ، اس حدیث کو سنی ابن کثیر (متوفی 1373) اور السیوطی (متوفی 1505) اور شیعہ طباطبائی (متوفی 1981) نے روایت کیا ہے۔ حضرت ابوبکر صدیق، حضرت عمر فاروق اور حضرت عثمان عفان کے دور خلافت میں حضرت ابوبکر صدیق اور حضرت عمر فاروق کی خلافت کے دوران ایک روایت میں ہے کہ جب خلیفہ ثانی حضرت محمد مصطفی صلی اللہ علیہ و آل وسلم کے منبر پر بیٹھ کر تقریر کر رہے تھے تو امام حسین نے انکے حضرت محمد صلی اللہ علیہ و آل وسلم کے منبر پر بیٹھنے پر اعتراض کیا تو حضرت عمر نے بھی خطبہ روک دیا اور منبر سے نیچے اتر آئے۔ ] حضرت عثمان کے دور میں، انہوں نے حضرت ابوذر الغفاری کا دفاع کیا، جس نے ظالموں کے بعض اقدامات کے خلاف تبلیغ کی تھی اور انہیں مدینہ سے جلاوطن کیا جانا تھا۔[31] متعدد روایات کے مطابق، حضرت علی نے امام حسن اور امام حسین سے کہا کہ وہ حضرے عثمان کے محاصرہ کے دوران تیسرے خلیفہ کا دفاع کریں اور ان کے پاس پانی لے جائیں۔ روایات میں کہا گیا ہے کہ حضرت عثمان عفان نے حضرت علی المرتضی سے مدد مانگی۔ جنہوں نے امام حسین کو بھیجا۔ بعض روایات کے مطابق امام حسین یا امام حسن حضرت عثمان کے دفاع میں زخمی بھی ہوئے تھے۔ حضرت علی المرتضی اور امام حسن کی خلافت کے دوران حضرت علی المرتضی کی خلافت کے دوران، امام حسین، اپنے بھائیوں امام حسن اور محمد ابن الحنفیہ کے ساتھ، اور اس کے کزن عبداللہ ابن جعفر حضرت علی المرتضی کے قریبی ساتھیوں میں سے تھے۔[10]، میدان جنگ میں ان کا ساتھ دیا[17]۔ حضرت علی المرتضی کی شہادت کے بعد لوگوں نے امام حسن کی بیعت کی۔ امیر معاویہ نہیں چاہتے تھے کہ ان کی بیعت کریں، جنگ کے لیے تیار ہو گئے۔ خانہ جنگی کی اذیتوں سے بچنے کے لیے، امام حسن نے امیر معاویہ کے ساتھ ایک معاہدہ کیا، جس کے مطابق امیر معاویہ اپنے دور حکومت میں کسی جانشین کا نام نہیں لیں گے، اور اسلامی برادری (امت) کو اپنا جانشین چننے دیں گے۔[33] میڈلونگ کا خیال ہے کہ امام حسین نے امام حسن کے ادب میں اس معاہدے کو قبول کر لیا۔ بعد میں جب کئی شیعہ رہنماؤں نے انہیں کوفہ کے قریب امیر معاویہ کے کیمپ پر اچانک حملہ کرنے کا مشورہ دیا تو انہوں نے یہ کہتے ہوئے انکار کر دیا کہ جب تک امیر معاویہ زندہ ہیں وہ صلح کی شرائط کی پابندی کریں گے امام حسن کی شہادت کے بعد بھی امام حسین معاہدے کی شرائط پر کاربند رہے[34] امام حسین کوفہ سے امام حسن اور عبداللہ بن جعفر کے ساتھ مدینہ کے لیے روانہ ہوئے۔ معاویہ کے دور خلافت میں 41ھ (660ء) میں امام حسن کی تخت نشینی اور 49ھ (669ء) میں ان کی وفات کے درمیان کے نو سال کے عرصے میں، امام حسن اور امام حسین معاویہ کے حق میں یا اس کے خلاف سیاسی مداخلت سے دور رہنے کی کوشش کرتے رہے اور مدینہ واپس چلے گئے۔ [12] اہل بیت کی حکمرانی کے حق میں جذبات کبھی کبھار چھوٹے گروہوں کی شکل میں ابھرتے تھے، جن میں سے زیادہ تر کوفہ سے تھے، امام حسن اور امام حسین سے ملاقات کرتے تھے اور ان سے اپنے لیڈر بننے کی درخواست کرتے تھے- جس کا انہوں نے جواب دینے سے ہمیشہ انکار کیا۔ جب امام حسن کو زہر دیا گیا تو انہوں نے خون خرابے کے خوف سے امام حسین کو اپنے مشتبہ شخص کا نام بتانے سے انکار کر دیا۔ امام حسن کی وفات کے بعد جب عراقیوں نے ایک بغاوت کے لئے امام حسین کی طرف رجوع کیا تو حسین نے انہیں حکم دیا کہ جب تک امیر معاویہ امام حسن کے ساتھ صلح کے معاہدے کی وجہ سے زندہ ہے انتظار کریں[11][17] اسی دوران مروان نے امیر معاویہ کو لوگوں کے امام حسین کے پاس بار بار آنے کی اطلاع دی تو امیر معاویہ نے مروان کو امام حسین سے تصادم نہ کرنے کی ہدایت کی، اسی دوران انہوں نے امام حسین کو ایک خط بھی لکھا جس میں انہوں نے "اسے مشتعل نہ کرنے کے مشورے کے ساتھ فراخدلانہ وعدے بھی کئے" بعد میں جب امیر معاویہ اپنے بیٹے یزید کی بیعت کر رہا تھا تو امام حسین ان پانچ سرکردہ افراد میں سے تھے جنہوں نے اس کی بیعت نہیں کی[17] کیونکہ جانشین مقرر کرنا امیر معاویہ کے ساتھ امام حسن کے معاہدے کی خلاف ورزی تھی۔ 10] اپریل 680 میں اپنی موت سے پہلے، امیر معاویہ نے یزید کو خبردار کیا کہ امام حسین اور عبد اللہ بن الزبیر اس کی حکومت کو چیلنج کر سکتے ہیں اور اسے ہدایت کی کہ اگر وہ ایسا کریں تو انہیں شکست دیں۔ یزید کو مزید نصیحت کی گئی کہ وہ امام حسین کے ساتھ احتیاط سے پیش آئے اور اس کا خون نہ بہائے، کیونکہ وہ حضرت محمد مصطفی صلی اللہ علیہ و آل وسلم کے نواسے ہیں [38]۔ یزید کی بیعت سے انکار 15 رجب 60 ہجری (22 اپریل 680ء) کو امیر معاویہ کی موت کے فوراً بعد یزید نے مدینہ کے گورنر ولید بن عتبہ ابن ابو سفیان کو حکم دیا کہ اگر ضروری ہو تو طاقت کے ساتھ حسین سے بیعت لے ۔[39][40] یزید کا مقصد شہر کے حالات پر قابو پانا تھا اس سے پہلے کہ لوگ امیر معاویہ کی موت سے آگاہ ہو جائیں۔ یزید کی فکر خاص طور پر خلافت میں اپنے دو حریفوں کے بارے میں تھی۔ حسین اور عبداللہ ابن زبیر جنہوں نے انکار بیعت کیا تھا [41] امام حسین نے سمن کا جواب دیا لیکن ملاقات کے خفیہ ماحول میں بیعت کرنے سے انکار کر دیا۔[17] مروان بن حکم نے ولید کو قید کرنے یا سر قلم کرنے کو کہا، لیکن امام حسین کے حضرت محمد صلی اللہ علیہ و آل وسلم کے ساتھ رشتے کی وجہ سے ولید ان کے خلاف کوئی کارروائی کرنے کو تیار نہیں تھا۔ کچھ دنوں کے بعد امام حسین یزید کی بیعت کئے بغیر مکہ روانہ ہو گئے۔ وہ مئی 680 کے شروع میں مکہ پہنچے [43] اور ستمبر کے شروع تک وہیں رہے۔ ان کے ساتھ ان کی بیویاں، بچے اور بھائی اور حسن کے بیٹے بھی تھے۔[10] امام حسین کی پہلی شادی حضرت رباب سے ہوئی تھی۔ ان کے والد عمرہ القیس، بنو کلب کے سردار تھے، حضرت عمر فاروق کے دور خلافت میں مدینہ آئے تھے، اور انہوں نے انہیں قدعہ قبائل کا سردار مقرر کیا تھا۔ حضرت علی المرتضی نے امام حسین کے ساتھ ان کی بیٹی کی شادی کی تجویز پیش کی، لیکن چونکہ امام حسین اور عمراالقیس کی بیٹی اس وقت چونکہ بہت چھوٹی تھیں، اس لیے شادی بعد میں ہوئی۔ امام حسین کی ایک بیٹی تھیں، آمنہ (یا آمنہ یا عمائمہ) جو سکینہ کے نام سے مشہور ہیں۔ حضرت رباب سے ایک بیٹا عبداللہ (یا ذرائع کے مطابق علی الاصغر) پیدا ہوئے۔ امام حسین کی کنیت، ابو عبد اللہ، غالباً انہی بیٹے سے مراد ہے۔ امام حسین کی شہادت کے بعد، حضرت رباب نے ایک سال ان کی قبر پر غم میں گزارا۔ [10]میڈلونگ کے مطابق حسین کے دو بیٹے تھے جن کا نام علی تھا۔ بڑے، علی ابن حسین زین العابدین جو بعد میں چوتھے شیعہ امام بنے، اس وقت 23 سال کے تھے جب ان کا چھوٹا بھائی (علی الاکبر) 19 سال کی عمر میں کربلا کی جنگ میں شہید ہوئے۔ علی الاکبر حضرت لیلیٰ سے پیدا ہوئے، جو ابی مرہ ثقفی کی بیٹی تھی، جو بنو امیہ کا حلیف تھا۔ دوسری طرف زین العابدین کی والدہ غالباً سندھ سے تعلق رکھنے والی ایک غلام تھیں جن کا نام غزالہ، صوفہ، سلامہ، شہزان یا شہربانو تھا۔ رپورٹوں کے مطابق، جسے عام طور پر شیعہ قبول کرتے ہیں، وہ یزدگرد III کی بیٹی تھی، جو ایران کے آخری ساسانی بادشاہ تھے جسے عربوں کی فتح کے دوران پکڑا گیا تھا۔ عصر حاضر کے شیعہ حلقوں نے احتیاط سے سجاد کو علی الاوسط اور علی الاصغر کو کربلا میں شیر خوار کے طور پر شناخت کیا ہے۔ عبد اللہ - جو عاشورہ کے واقعات میں علی اصغر کے نام کے ذکر سے جانا جاتا ہے۔ ام اسحاق، طلحہ کی بیٹی، امام حسین کی دوسری بیوی تھی، جس نے پہلے امام حسن سے شادی کی تھی۔ اور ان سے امام حسین کی ایک بیٹی پیدا ہوئی جس کا نام فاطمہ تھا، [135] جس نے بعد میں حسن بن حسن سے شادی کی۔ شخصیت اور ظاہری شکل امام حسین کا رنگ سفید تھا اور کبھی سبز پگڑی پہنتے تھے اور کبھی کالی پگڑی۔ وہ غریبوں کے ساتھ سفر کرتے اور انہیں اپنے گھر بلا کر کھانا کھلاتے۔ عمرو بن العاص انہیں اہل آسمان کے نزدیک زمین والوں میں سب سے زیادہ محبوب سمجھتے تھے۔ انسائیکلو پیڈیا آف اسلام کے مطابق، امام حسین کی اخلاقی خصوصیات میں سے ایک رواداری، عاجزی، فصاحت اور وہ خصوصیات ہیں جن کا اندازہ ان کے طرز عمل سے لگایا جا سکتا ہے، جیسے موت کو حقیر سمجھنا، شرمناک زندگی سے نفرت، تکبر اور اسی طرح کی دیگر خصوصیات۔ 9] بہت سی روایات میں امام حسین اور ان کے بھائی کی حضرت محمد صلی اللہ علیہ و آل وسلم سے مشابہت بیان کی گئی ہے، اور ان میں سے ہر ایک کو ان کے دادا کے آدھے سے تشبیہ دی گئی ہے۔[136] امام حسین مدینہ منورہ میں اپنی سخاوت کے لیے مشہور تھے، اور انہوں نے اپنے غلاموں اور لونڈیوں کو اگر کوئی اچھا سلوک دیکھا تو آزاد کر دیا۔ ایک روایت میں ہے کہ امیر معاویہ نے امام حسین کے پاس ایک لونڈی بھیجی جس کے ساتھ بہت سا مال اور کپڑا تھا۔ جب نوکرانی نے قرآن کی آیات اور دنیا کے عدم استحکام اور انسان کی موت کے بارے میں ایک نظم پڑھی تو امام حسین نے اسے آزاد کر دیا اور اسے جائیداد دے دی۔ ایک دفعہ امام حسین کے غلاموں میں سے ایک نے کچھ غلط کیا۔ لیکن جب غلام نے آیت "وَالْعافینَ عَنِ النَّاس" پڑھی تو امام حسین نے اسے معاف کر دیا اور اس کے بعد غلام نے آیت "وَلَلَّهُ یُحِبُّ الْمُحِسِينَ" پڑھی تو امام حسین نے اس غلام کو آزاد کر دیا۔ امام حسین نے اپنے بچوں کے استاد کو بڑی رقم اور کپڑے دیے۔ جبکہ یہ تسلیم کرتے ہوئے کہ اس سے استاد کے کام کی قدر کی تلافی نہیں ہوتی۔ کہا جاتا ہے کہ امام حسین غریبوں کے لیے کھانے کے تھیلوں کی بوریاں اٹھا کر ان کے گھر پہنچایا کرتے اور ان بوریوں کے اٹھانے کی وجہ سے ان کے کندھوں پر جو نشان پڑے وہ عاشورہ کے دن ان کے جسم پر واضح تھے۔ قرآن و حدیث میں قرآن کی آیات میں بہت سے سنی اور شیعہ مفسرین، جیسے فخر رازی اور محمد حسین طباطبائی، سورہ الانسان کی اپنی تفسیر میں، اس کے نزول کو حضرت علی اور حضرت فاطمہ الزاہراہ کی طرف منسوب کرتے ہیں اور ان کے بچے یا بچوں کی بیماری اور ان کی صحت یابی کے لیے نذر مانتے ہیں۔ 139][140] تفسیر المیزان میں سید محمد حسین طباطبائی نے کہا ہے کہ مباہلہ کا واقعہ ایک طرف پیغمبر اسلام اور ان کے خاندان اور دوسری طرف نجران کے عیسائیوں کے درمیان تصادم کی کہانی بیان کرتا ہے۔ طباطبائی کہتے ہیں کہ روایات کے مطابق آیت مباہلہ میں ہمارے بیٹوں کے معنی حسن اور حسین تھے۔[141] بہت سے سنی مفسرین نے یہ بھی کہا ہے کہ اس میں لوگ علی، فاطمہ، حسن اور حسین ہیں۔ المیزان میں آیت تطہیر کی تفسیر کرتے ہوئے طباطبائی نے اس آیت کے مخاطب کو اہل کساء کہا ہے اور اس کی احادیث کی طرف اشارہ کیا ہے جن کی تعداد ستر سے زیادہ ہے اور زیادہ تر اہل سنت کی ہیں۔[140] فخر رازی اور ابن کثیر جیسے سنی مفسرین نے اپنی تفسیر میں اس آیت میں اہل بیت کی مثال کے بارے میں مختلف روایات نقل کرتے ہوئے علی، فاطمہ، حسن اور حسین کو مثال کے طور پر شمار کیا ہے۔[142] طباطبائی نے سورہ شوریٰ کی آیت نمبر 23 کی تفسیر و تشریح میں المیزان میں مفسرین کے مختلف اقوال کی روایت اور تنقید کرتے ہوئے کہا ہے کہ "قرب" کا معنی اہل بیت کی محبت ہے۔ محمد; یعنی علی، فاطمہ، حسن اور حسین ہیں۔ وہ سنیوں اور شیعوں کی مختلف روایات کا حوالہ دیتے ہیں جس نے اس مسئلے کو واضح کیا ہے۔ فخر الرازی اور ابن کثیر جیسے سنی مفسرین نے بھی اس مسئلہ کا حوالہ دیا ہے۔[143][144] سورہ احقاف کی آیت 15 میں حاملہ عورت کے بارے میں بتایا گیا ہے جو بہت زیادہ تکلیف برداشت کرتی ہے۔ اس آیت کو فاطمہ زہرا کی طرف اشارہ سمجھا جاتا ہے، اور بیٹے کو حسین کے نام سے بھی جانا جاتا ہے، جب خدا نے اس نواسے کی قسمت کے بارے میں حضرت محمد صلی اللہ علیہ و آل وسلم سے تعزیت کا اظہار کیا اور حضرت محمد صلی اللہ علیہ و آل وسلم نے حضرت فاطمہ زہرا سے اس کا اظہار کیا تو وہ بہت پریشان ہوئیں۔ دوسری آیات جو شیعہ حسین کی طرف منسوب کرتے ہیں ان میں سورہ الاحزاب کی آیت نمبر 6 اور سورہ زخرف کی 28 آیتیں شامل ہیں، جن کی تشریح ان کی نسل سے امامت کے تسلسل سے کی گئی ہے۔ اس کے علاوہ آیات 77 سورہ نساء، 33 سورہ الاسراء اور 27 ویں سے 30 ویں سورہ الفجر شیعہ کے نقطہ نظر سے بغاوت اور قتل حسین کی طرف اشارہ کرتی ہیں۔[30] پیغمبر اسلام کی سیرت میں "ثقلین" سے متعلق روایتوں میں دوسرے وزن کے لیے حسین کو مثال کے طور پر رکھا گیا ہے۔ حسنین سے متعلق روایتوں کے ایک اور گروہ میں ان کا تعارف "جنت کے جوانوں کے سردار" کے طور پر کیا گیا ہے۔ امام حسین کے انجام کی خبر روایات ہیں کہ جبرائیل نے امام حسین کی پیدائش کے وقت حضرت محمد صلی اللہ علیہ و آل وسلم کو اطلاع دی تھی کہ ان کی امت امام حسین کو قتل کرے گی اور امامت حسین کی ہوگی اور محمد نے اپنے ساتھیوں کو بتایا کہ امام حسین کو کیسے قتل کیا جانا تھا۔ اللہ تعالیٰ نے پچھلے انبیاء کو بھی قتل حسین کی خبر دی تھی۔ حضرت علی کو یہ بھی معلوم تھا کہ امام حسین کو کربلا میں قتل کیا جائے گا اور جب وہ اس علاقے سے گزرے تو وہ رک گئے اور رو پڑے اور محمد کی خبر کو یاد کیا۔ انہوں نے کربلا (کربلا) کو (کرب) کرب اور (بلا) آفت سے تعبیر کیا۔ کربلا کے مقتول بغیر حساب کے جنت میں داخل ہوں گے۔ حسین ابن علی سے روایات، خطبات اور خطوط محفوظ ہیں جو سنی اور شیعہ ذرائع میں دستیاب ہیں۔ ان کے متعلق روایات کو امامت سے پہلے اور بعد کے دو ادوار میں تقسیم کیا جا سکتا ہے۔ پہلے دور میں - جو ان کے دادا، والد، والدہ اور بھائی کی زندگی میں ان کی زندگی کا دور ہے - ان کے بارے میں کم از کم دو قسم کی روایتیں ہیں: پہلی، ان کے رشتہ داروں سے روایتیں، اور دوسری، ان کی ذاتی احادیث۔ . سنی منابع میں ان احادیث میں صرف ان کی حدیث کے بیان کے پہلو پر غور کیا گیا ہے۔ ان مسندوں میں پیغمبر اسلام کے صحابہ کی مسند کی طرح ایک مسند بھی ہے جس کا نام حسین ابن علی ہے۔ ابوبکر بزار نے اپنی مسند میں حسین ابن علی کی مسند کو 4 احادیث کے ساتھ اور طبرانی نے ان کی مسند کو بالترتیب 27 احادیث کے ساتھ نقل کیا ہے۔ حسین ابن علی کی مسند میں خود حسین کی احادیث کے علاوہ پیغمبر اسلام اور علی ابن ابی طالب کی بھی احادیث موجود ہیں۔ موجودہ دور میں عزیز اللہ عطاردی نے امام شہید ابی عبداللہ الحسین ابن علی کی دستاویز مرتب کی ہے۔[146] حسین ابن علی کے خطبات کے زمرے میں ان کے بعض خطبات قبل از امامت کے ہیں جن میں سے بعض بہت مشہور ہیں۔ چنانچہ حسین ابن علی کا خطبہ، علی ابن ابی طالب اور دیگر لوگوں کی عوامی بیعت کے بعد، جنگ صفین میں ان کا خطبہ ہے۔ ایک اور مثال امام حسین کی ایک نظم ہے جو اپنے بھائی امام حسن کی تدفین کے بعد ہونے والے نقصان کے بارے میں ہے۔ امامت میں حسین ابن علی کے خطبات اور خطوط ان سے پہلے سے زیادہ ہیں۔ لوگوں کے نام ان کے خطوط، نیز معاویہ کو ان کے خطوط امن معاہدے کی پاسداری کے حوالے سے، معاویہ کے اقدامات کا سراغ دیتے ہیں، خاص طور پر یزید کے بارے میں، نیز اس کے خطبات اور خطوط شروع میں سفارشی خطوط کی صورت میں۔ یزید کی خلافت کا۔ خطبات اور خطوط کا ایک اہم حصہ حسین بن علی کی رد بیعت کے دور سے تعلق رکھتا ہے۔ کوفیوں، بصریوں اور مسلم ابن عقیل جیسے لوگوں سے خط و کتابت اس طرح ہے۔ فقہ، تفسیر، عقائد، احکام و خطبات، دعاؤں، نصیحتوں اور اشعار کے موضوعات پر احادیث بھی حسین سے باقی ہیں، جو شیعہ اور سنی مآخذ میں بکھری ہوئی ہیں اور مجموعوں کی صورت میں مرتب کر کے شائع کی گئی ہیں۔ حسین ابن علی کی چھوڑی ہوئی دعائیں بھی ہیں جو الصحیفہ الحسین یا امام حسین کی دعائیں کے عنوان سے مجموعوں کی شکل میں شائع ہوئی ہیں۔[147]سب سے مشہور شیعہ دعاؤں میں سے ایک، نیز حسین کے کام، جو کتاب مفاتیح الجنان میں درج ہیں، دعا عرفہ ہے۔ ولیم سی چٹک کے مطابق، یہ دعا اپنی خوبصورتی اور روحانی ساخت کے لحاظ سے سب سے مشہور دعا ہے اور ہر سال عرفہ کے دن اور حج کے موسم میں پڑھی جاتی ہے - یعنی جب اسے حسین ابن علی نے پہلی بار پڑھا تھا۔ - شیعہ زائرین کی طرف سے شیعہ الہیات میں اس دعا کا ایک خاص اور اہم کردار ہے اور فلسفی اور صوفی ملا صدرا نے اپنی تحریروں میں اس دعا کا متعدد بار ذکر کیا ہے۔[148] تقریباً تمام مسلمان امام حسین کو اس لیے قابل احترام سمجھتے ہیں کہ وہ محمد مصطفی صلی اللہ علیہ و آل وسلم کے نواسے تھے اور اس عقیدے کی وجہ سے کہ انھوں نے اپنے آپ کو ایک آدرش کے لیے قربان کر دیا تھا۔ مورخ ایڈورڈ گبن نے کربلا کے واقعات کو ایک المیہ قرار دیا ہے۔ مورخ سید اکبر حیدر کے مطابق، مہاتما گاندھی نے اسلام کی تاریخی ترقی کو فوجی طاقت کے بجائے "حسین جیسے مسلمان بزرگوں کی قربانیوں" سے منسوب کیا۔[154] انہیں شہداء کے شہزادے (سید الشہداء) کے نام سے یاد کیا جاتا ہے۔[81] مورخ G.R. Hawting نے کربلا کی جنگ کو "مصیبت اور شہادت" کی ایک اعلیٰ مثال قرار دیا ہے۔[149]

سوشل میڈیا کی جنگ کے حربے

گزشتہ کالم میں ہم نے آپ کو بتایا تھا کہ کیسے سوشل میڈیا کی ابتدا ہوئی اور کیسے سرچ ببل اور ایکو چیمبر آپ کی ذہنی سوچ پر اثر انداز ہوتے ہیں نیز کیسے ان ایکو چیمبرز اور سرچ ببلز کو سیاسی سوچ بدلنے کیلئے استعمال کیا جاتا ہے۔ آئیے اب آپ کو بتائیں کہ اس سلسلے میں کون سے حربے اب تک استعمال کئے گئے۔ ہم نے پچھلے کالم میں بتایا تھا کہ یوں تو اس وقت تمام سیاسی جماعتوں اور انکے چھوٹے سے بڑے رہنماوں کے چھوٹے بڑے میڈیا سیل کام کر رہے ہیں لیکن تحریک انصاف کے علاوہ کسی دوسری جماعت نے سوشل میڈیا کو اتنا منظم نہیں کیا جتنا اس نے ادارہ جاتی طور پر اس میڈیم کو استعمال کیا ہے۔ باقی جماعتیں روایتی طور پر زیادہ تر مین اسٹریم میڈیا پر فوکس رکھتی ہیں لیکن پاکستان تحریک انصاف ان سے ایک قدم آگے ہے۔ اس جماعت نے اس میڈیم کو باقاعدہ ادارہ جاتی شکل دی ہے اور اسے اپنے پراپیگنڈہ ٹول کے طور پر استعمال شروع کیا ہے۔ چونکہ اس جماعت میں کارپوریٹ کے لوگوں کی ایک بڑی تعداد شامل ہے جو نا صرف پڑھی لکھی بلکہ جدید علوم سے آشنا ہے اس لئے تحریک انصاف نے نوجوانوں کے لیے سوشل میڈیا ماہرین کی مدد سے اپنے دور حکومت میں ترجمانوں کی ایک پوری فوج بھرتی کی جو مختلف ایشوز پہ ایک بیانیہ تشکیل دیتی جو ایک دوسری سوشل میڈیا ٹیم جس کے ہیڈ کا دفتر پرائم منسٹر ہاوس میں ہی تھا، پھیلانے کا فریضہ سرانجام دیتی۔ اس سوشل میڈیا ٹیم کو باقاعدہ سرکاری نوکریاں دی گئیں بلکہ ان کیلئے ایک سپیشل بجٹ منظور کیا گیا۔ یہ ٹیمز اب بھی ایکٹو ہیں اور اب انہیں خیبر پختونخواہ سے مینیج کیا جا رہا ہے کیونکہ وہاں پی ٹی آئی کی حکومت ہے اور اس کے ہیڈ جو پہلے پرائم منسٹر آفس میں بیٹھا کرتے تھے اب پنجاب حکومت کے مشیر برائے اطلاعات ہوں گے۔ اب آئیے ان حربوں کی طرف جو اس سوشل میڈیا کی سیاسی جنگ میں پی ٹی آئی اپنے سوشل میڈیا کے ماہرین کی مدد سے استعمال کر رہی ہے۔ آر اے شہزاد ایک سائکالوجسٹ، چائلڈ پروٹیکشن ایڈوائزر اور ریسرچر ہیں اور ڈنمارک میں مقیم ہیں۔ سوشل میڈیا خاص طور ٹوٹر پہ بہت ایکٹو ہیں۔ وہ ان حربوں کا سائیکو پولیٹیکل انیلسس کرتے ہوئے اپنے سلسلہ وار ٹویٹ تھریڈ میں لکھتے ہیں کہ: "آپ نے شاید عمران خان کی اس بات کو آسان لیا ہو جس میں اس نے کہا تھا کہ میں مائینڈ گیم کا ماہر ہوں مگر اس کے پیچھے ایک پوری سائنس تھی" "اس کے لیے ہمیں سمجھنا ہو گا کہ آج کے دور میں کیسے مختلف کمپنیاں اپنی مارکیٹنگ مہمات سے ذہن سازی کرتی اور ذہن بدلتی ہیں۔ ڈیجیٹل اور سوشل میڈیا کے بعد اب الیکشن محض ایک ووٹنگ کا عمل نہی رہ گیا بلکے ایک سائنس بن گئی ہے اور مغرب میں اس پر بے شمار ریسرچ اور سکینڈل بھی سامنے آ چکے ہیں ٹرمپ کا الیکشن اور Brexit اس کی بڑی مثال ہیں۔ ٹرمپ کا الیکشن وہ پہلی مثال تھی جس نے بگ ڈیٹا کو استعمال کرتے امریکی ووٹر کے ذہنوں پر قبضہ کیا ٹرمپ نے کیمبرج انیلیٹیکا نامی ایک ڈیٹا فرم ہائر کی اس نے فیس بک کے آٹھ کروڑ لوگوں کا ڈیٹا چوری کر کے ان معلومات سے ایک ٹیکنیک Psychographic کا استعمال کر کے ایسے سیاسی میسج بنائے جو لوگوں کے تعصبات اور دوسری نفسیاتی کمزوریوں کو سامنے رکھتے انکی رائے کو متاثر کر سکتے تھے۔ Psychographic کیا ہوتا ہے؟ یہ بنیادی طور پر آپ کی نفسیاتی پروفائلنگ ہوتی ہے۔ آپ کیا پسند کرتے ہیں، آپ کی رائے دلچسپیاں اور شخصیت کے دوسرے پہلو ہوتے ہیں۔ مارکیٹنگ سٹریٹجی میں جہاں ڈیموگرافکس انفارمیشن لی جاتی وہاں آپ کا Psychographic پروفائل بھی لیا جاتا تاکہ آپ کی پسند نا پسند اور میلان رویے سب سمجھا جا سکے. کمپیوٹر پر آپ جو وقت گزارتے، جو کلک کرتے ہیں، ان سب کا ڈیٹا جمع ہوتا ہے، پھر اسی کی بنیاد پر آپ کی ایک Psychometric پروفائلنگ ہوتی ہے۔ ایک کمپنی GSR یہ ڈیٹا جمع کرتی ہے۔ یہاں سے ہی کیمبرج اینیلٹیکا نے ڈیٹا خریدا. 28 سال کا Cristopher Wylie رضاکارانہ طور پر سامنے آیا اور ساری دنیا کو ہلا کے رکھ دیا۔ اس نے بتایا کہ کیسے آن لائن ڈیٹا اور سوشل میڈیا ڈیٹا سے پروفائل وہ طریقہ ہے جسے فوجی جاسوس ایجنسیاں information operations کہتی ہیں۔ یوں سیاست کی دنیا میں وہ کام ہوا کہ جب آپ کا ڈیٹا اور آن لائن psychometric profiling جمع ہو جاتی ہے تو پھر مارکیٹنگ کی تکنیک micro targeting کی جاتی ہے اور یہی کام پی ٹی آئی نے کیا۔ انہوں نے برطانیہ میں ایک ایسی فرم ہائر کی جو ان کے لیے پولیٹیکل کمپین ڈیزائن کرتی ہے۔ سوشل میڈیا ہی وہ مین فورم تھا جہاں سے عمران خان نے قوم کے ایک بڑے حصے کو اتنے موثر انداز میں مٹھی میں لیا کہ آج ملک کا تمام نیریٹو بلڈنگ اس کے ہاتھ میں ہے۔ مائکرو ٹارگٹ کی تکنیک امریکی الیکشن میں جارج بش نے بھی استعمال کی تھی اور مختلف ڈیٹا کی مدد سے تیس ایسی ووٹر کیٹگری بنائی تھی جو مختلف پسند نا پسند اور میلان رکھتے تھے اور پھر اس کے مطابق ہی انہوں نے ووٹر کے لیے میسج بنائے۔ پی ٹی آئی نے بھی یہی تکنیک اختیار کی۔ مختلف ڈیٹا فرمز یہ دعوی کرتی ہیں کہ ان کے پاس آن لائن اتنا ڈیٹا ہوتا ہے کہ وہ یہ ٹھیک اندازہ لگا سکتے کہ کیا چیز آپ کو خوش کرے گی اور کیا نہیں۔ پی ٹی آئی نے انہی فرمز کی مدد سے پاکستانیوں کی آن لائن پروفائلنگ کروائی پھر مختلف طبقات کے لیے ایسے نعرے بنائے جو ان کے مزاج کے مطابق انہیں خوش کر دیں انہیں لگے کہ یہی وہ لیڈر ہے جو اصل میں انکے مسائل سمجھتا اور انکی زبان میں بات کرتا ہے۔ آج امریکہ میں اس بات پر بحث ہو رہی کہ لوگوں کی نفسیاتی پروفائلنگ سے، ان کی نفسیاتی کمزوریوں کی مدد سے ان کی رائے متاثر کرنا فری اینڈ فئیر الیکشن کے تصور کے خلاف ہے مگر پاکستان میں بدقسمتی سے کوئی سیاسی جماعت اس ٹاپک پر بات نہی کر رہی۔ آج ضرورت اس امر کی ہے کہ سیاسی جماعتیں اور سیاسی ورکرز بشمول سوشل میڈیا صارف سوشل میڈیا سائنس کو سمجھیں۔ یہ بات سمجھنے کی اشد ضرورت ہے کہ آپ کا آن لائن ڈیٹا اب ماہرین نفسیات اور مارکیٹنگ ایکسپرٹ کو اس قابل بناتا ہے کہ آپ کو اسطرح ذہنی طور پر کنٹرول کر لیا جائے کہ آپ کو احساس بھی نا ہو کہ آپ ذہنی غلام بن چکے ہیں۔" آگے چل کر وہ مزید لکھتے ہیں کہ: "پروپیگنڈہ ایک سائنس ہے اور اس کی جدید تیکنیک ایڈورٹائزنگ کی صنعت عام طور پر استعمال کرتی ہے۔ اس وقت ایڈورٹائزنگ میں برانڈ کی مشہوری کے لیے 7 مین ٹیکنیکس استعمال ہوتی ہیں۔ عمران خان کی تقریر اور کمپین دونوں کا میں نے Analysis کیا ہے اس کی کمپین ہو یا تقریر اس میں پروپیگنڈہ کی وہ ساتوں ٹکنیکس موجود ہوتی ہیں۔ عمران خان اکثر کہتے ہیں کہ پی پی اور نون لیگ نے معیشت ڈبو دی اور وہ مزے سے اپنا دور گول کر جاتے ہیں۔ اسی طرح وہ اکثر باتوں میں کچھ فیکٹ گول کر دیتے ہیں۔ اسے پروپیگنڈہ کی اصطلاح میں Card-Stacking کہتے ہیں۔ اشتہار بازی میں یہ کثرت سے استعمال ہوتی ہیں۔ جیسے اکثر برانڈ بڑا بڑا لکھتے ہیں ستر فیصد ڈسکاونٹ، نیچے کونے میں لکھا ہوتا ہے، منتحب آئٹم پر۔ یعنی مکمل حقائق نہیں بتاتے۔ آپ کو تحریک انصاف والے اکثر ایسے کمپریزن کرتے نظر آتے ہیں جو مکمل حقائق پر مشتمل نہی ہوتے اور یک طرفہ، Biased اور مس لیڈنگ ہوتے ہیں مگر اس کے پیچھے یہی تکنیک ہے۔" "روح افزا کےلیے مشروب مشرق کا لفظ استعمال ہوتا ہے اسی طرح لفظ "ہر پاکستانی کی پسند" بھی اکثر اشتہارات میں ہوتا ہے۔ اس تیکنیک کو Bandwagon Propaganda کہتے ہیں۔ اس پروپیگنڈہ میں آپ ایسا ماحول بناتے ہیں کہ لوگ ایک کراوڈ کا حصہ محسوس ہوں۔ ایسے الفاظ استعمال ہوتے ہیں جیسے trending now کی طرح کے الفاظ ہوتے ہیں کیونکہ انسانی نفسیات بنیادی طور پر یہ ہے کہ وہ سب کے ساتھ Fit in ہونا چاہتی ہے۔ تحریک انصاف بھی یہی کرتی ہے ان کے نعرے اور سوشل میڈیا مہم اٹھا کر دیکھ لیجئے یوتھ کی پسند، ہر محب وطن پاکستانی، ہر مسلمان اور عاشق رسول وغیرہ جیسے الفاظ بنیادی طور پر Bandwagon Propaganda ہوتے ہیں" "آپ نے اکثر تحریک انصاف کے سوشل میڈیا پر ہر جلسے وغیرہ کے بعد بچوں کے پلے کارڈ یا کسی بوڑھی عورت کا انٹرویو یا کسی مزدور کے پیسے دینے کی فوٹو نظر آتی ہو گی اس تکنیک کو Plain Folks Propaganda کہا جاتا ہے جس میں عام لوگوں کے استعمال سے لوگوں کو persuadکیا جاتا ہے" "آپ کو ہر دوسرا فنکار یا ٹک ٹاکر وغیرہ تحریک انصاف کا حامی نظر آتا یہ لوگ معاوضے پر endorsements کرتے ہیں پروپیگنڈہ کی زبان میں اسے Testimonial Propaganda کہا جاتا ہے تاکہ عام عوام کو لگے کہ ہر طرف ان کی ہی مقبولیت ہے" آپ کو عمران خان اپنی تقریروں میں اکثر مخالفین کے نام رکھ کر ان کی تذلیل کر کے مذاق اڑاتا نظر آتا ہیں۔ جیسے ڈیزل، ککڑی، چور، ڈاکو، بیماری وغیرہ۔ یہ بنیادی طور پر پروپیگنڈہ کی ہی تکنیک ہے جسے Name Calling Propaganda کہتے ہیں آپ اگر اشتہار بازی کی صنعت کو دیکھیں تو بڑے برانڈ آپ کو یہ تکنیک استعمال کرتے نظر آئیں گے مثال کے طور پر برگر کنگ اپنے اشتہار میں میکڈانلڈ کا مذاق اڑاتا نظر آتا ہے ان کا نام نہی لیتا مگر انکے بگ میک کا signature box لیا اور کہا کہ ہمارا برگر تو ان کے بڑے برگر کے ڈبے تک میں نہی آتا۔ عمران خان کی تقریر میں یہی تکنیک ہوتی ہے" "میں اس ٹاپک پر گھنٹوں لکھ سکتا ہوں مگر چند مثالوں سے یہ بتایا کہ تحریک انصاف کی جس کمپین اور باتوں کا ہم مذاق اڑاتے ہیں وہ بنیادی طور پر carefully crafted propaganda techniques ہیں جو جدید ایڈورٹائزنگ میں استعمال ہوتی ہیں اور انہیں ماہرین نے تحریک انصاف کے لیے بنایا ہوتا ہے۔ یہی وجہ ہے کہ ہمیں جتنی مرضی سطحی اور عجیب لگے وہ payback کر رہی ہیں کیونکہ عوام کی نفسیات کو سامنے رکھ کر بنائی گئی ہیں۔" اب آپ یہ سوچیں کہ باقی سیاسی جماعتیں اس سوشل میڈیا وار میں کہاں کھڑی ہیں؟ کیا وہ اتنی سائنسی بنیادوں پر بنی پروپیگنڈہ کمپین کا مقابلہ کر سکتی ہیں ؟ اور ساتھ یہ بھی سوچیں کہ اربوں روپے کی فارن فنڈنگ کہاں خرچ ہوئی ؟ لیکن اس سب میں سچائی اور حقائق کا جو قتل ہوا ہے اس کا ازالہ کیا ممکن ہے ؟

سوشل میڈیا کی جنگ

یہ 90 کی دہائی کے آخری سالوں کی بات ہے کہ ہم انٹرنیٹ کی دنیا میں داخل ہوئے۔ کمپیوٹر کی ڈیسک ٹاپ شکل پاکستان میں 80 کی دہائی کے اواخر میں آ چکی تھی اور اس کا کارپوریٹ اداروں میں استعمال بھی شروع ہو چکا تھا تاہم انٹرنیٹ کا استعمال محدود تھا کیونکہ پاکستان پر ان دنوں تجارتی پابندیوں کے باعث کمپیوٹر کے اس وقت کے جدید ورژن کی امپورٹ ممنوعہ کیٹیگری میں آتی تھی۔ خیر لمبی کہانی ہے۔ ہم اپنے موضوع کی طرف لوٹتے ہیں۔ انٹرنیٹ کا ڈومیسٹک استعمال 1998 میں بہت محدود تھا اور چیٹ صرف MIRC نامی سافٹ وئیر سے ہی ممکن ہو پاتی تھی لیکن پھر انفارمیشن ٹیکنالوجی کا ایک طوفان شروع ہوا اور اس کی شروعات یاہو اور ایم ایس این کے چاٹ رومز تھے۔ یہ سوشل میڈیا کی ابتدا تھی۔ چیٹ رومز سے بات یاہو اور ایم ایس این گروپس اور میسینجرز تک پہنچی اور جب گوگل اس میدان میں آیا تو اس نے بھی اپنے میسنجر اور گروپس سے ہی اپنی ابتدا کی۔ یہ پہلا موقع تھا کہ عالمی کمیونٹی کو ہر ملک کے شہریوں کے رہن سہن، عادات، بات چیت اور پسند ناپسند سے آشنائی ہوئی، دوستیاں ہوئیں اور گروپس کا تصور راسخ ہونا شروع ہوا۔ انسان جب سے تہذیب کے جامے میں آیا ہے تب سے گروہوں کی شکل میں رہنا پسند کرتا ہے۔ یہ گروپ معاشرے کی بنیاد بنے، قبیلے وجود میں آئے، شہروں کی بنیاد پڑی اور بالآخر ملکوں، براعظموں اور رنگ و نسل کی شکل میں گروپنگ ہوئی۔ انٹرنیٹ کمیونٹی چونکہ زبان، نسل، رنگ، شہر، ملک اور یہاں تک کہ براعظم سے ماورا تھی اس لئے یہاں رجحانات کی بنیاد پر گروپنگ ہوئی۔ جیسے جیسے انٹرنیٹ کی مختلف ایڈوانس شکلیں سامنے آئیں ویسے ویسے رجحانات کا تنوع بھی بڑھا۔ اب یہاں سے ان رجحانات اور ترجیحات کا مطالعہ بھی شروع ہوا۔ چونکہ یہ ایجاد اور اس میں مزید اختراعات ترقی یافتہ ممالک سے آ رہی تھیں اس لئے وہ اس پہ محتاط بھی تھے کیونکہ ہر ایجاد کا مثبت و منفی استعمال انسان کی سرشت میں ہے اس لئے انہوں نے پہلے پہل ان اختراعات کے صرف قانونی پہلووں پر توجہ کی مثلا آپ جب بھی کوئی سافٹ وئیر اپنے کمپیوٹر پر انسٹال کرتے ہیں تو ایک لمبا ایگریمنٹ سامنے آتا ہے اور جب تک آپ اسے قبول نا کرلیں سوفٹ وئیر کھلتا نہیں اسی طرح تقریبا سب سوشل میڈیا ایپس آپ کو کسی غیر قانونی/ غیر اخلاقی مواد کو رپورٹ کرنے کی نا صرف سہولت دیتے ہیں بلکہ اس کیلئے حوصلہ افزائی بھی کرتے ہیں۔ بلاک کرنے کی سہولت بھی دی جاتی ہے۔ یہ سب تبدیلیاں وقت کے ساتھ ساتھ مسائل سامنے آنے کے بعد ہوئیں اور انٹرنیٹ کمیونٹی نے وقت کے ساتھ ساتھ سیکھا اور اس کے مطابق انٹر نیٹ کے استعمال کنندگان کیلئے سہولیات اور فرائض کی جانب مائل کرتے گئے۔ لیکن ان ممالک کے کمپیوٹر ماہرین، نفسیات دان حضرات اور سائینسدانوں نے جس پہلو پر کام کیا وہ رجحانات کا مطالعہ اور اس کا منفی/ مثبت استعمال بھی ہے۔ اس اسٹڈی کے مطابق چونکہ انسان اپنی طبع کے مطابق گروہوں میں رہنے کا عادی ہے اس لئے اس کی ترجیح اپنے رجحان کے لوگوں کے ساتھ میل جول ہوتا ہے اس وقت آپ اگر غور کریں تو تمام سوشل میڈیا ایپس چاہے وہ فیس بک ہو، چاہے ٹوٹر یا پھر ان سے ملتے جلتے دوسرے انٹر نیٹ پروگرام، آپ کی ترجیح اپنے پروفائل میں انہی لوگوں کو جمع کرنا ہوتا ہے جن سے آپ کی دوستی ہوتی ہے یا عزیز داری اور ان میں سے بھی آپ کی ٹائم لائن پہ بھی وہی لوگ اوپر ہوتے ہیں جن سے آپ کا میل جول زیادہ رہتا ہے۔ اس دائرے کے علاوہ آپ ان لوگوں کو اپنے حلقے میں لاتے ہیں جن سے آپ متاثر ہوتے ہیں اور انہیں فالو کرنا چاہتے ہیں۔ اس صورتحال میں ماہرین کا اجماع ہے کہ انسان ایک ایکو چیمبر میں چلا جاتا ہے۔ ایکو چیمبر کیا ہے اور یہ کیسے کام کرتا ہے آئیے آپ کو اس سے متعارف کرائیں ماہرین سماجیات کا کہنا ہے کہ: "انٹرنیٹ نے قابل رسائی سیاسی معلومات کی تنوع اور مقدار کو بڑھا دیا ہے۔ مثبت پہلو پر، یہ عوامی بحث کیلئے زیادہ بڑا پلیٹ فارم بن سکتا ہے۔ منفی پہلو پر، معلومات تک زیادہ رسائی نظریاتی طور پر ایک ہی نظریے کے لوگوں کے لیے ایک ہی جگہ اکٹھے ہونے کا باعث بن سکتی ہے۔ ایک انتہائی "ایکو چیمبر" میں، اپنے نظریے کے حق میں معلومات کا حامل ایک شخص دعویٰ کرے گا، جسے بہت سے ہم خیال لوگ پھر دہراتے ہیں، سنتے ہیں اور دوبارہ دہراتے ہیں (اکثر مبالغہ آمیز یا دوسری صورت میں مسخ شدہ شکل میں) جب تک زیادہ تر لوگ یہ فرض نہ کر لیں کہ کہانی سچ ہے۔ ایکو چیمبر ایک ایسا ماحول ہے جہاں کسی شخص کو صرف ایسی معلومات یا آراء کا سامنا کرنا پڑتا ہے جو ان کی اپنی سوچ کی عکاسی کرتی ہیں اور ان کو تقویت دیتی ہیں۔ ایکو چیمبر اصطلاح ایک استعارہ ہے جس کی بنیاد ایک صوتی ایکو چیمبر پر ہوتی ہے، جس میں کھوکھلی دیوار میں آوازیں گونجتی ہیں۔ انٹرنیٹ پر سوشل میڈیا کمیونٹیز کے اندر اس بازگشت اور یکساں اثر کے لیے ایک اور ابھرتی ہوئی اصطلاح ثقافتی قبائلیت ہے۔ بہت سے اسکالرز ان اثرات کو نوٹ کرتے ہیں جو گونجتے ہیں۔ ایکو چیمبر شہریوں کے موقف اور نقطہ نظر پر اثر انداز ہوسکتے ہیں، اور خاص طور پر سیاست پر اثرات مرتب ہوتے ہیں۔ ایکو چیمبر میں حصہ لے کر، لوگ ایسی معلومات حاصل کرنے کے قابل ہوتے ہیں جو مخالف آراء کا سامنا کیے بغیر ان کے موجودہ خیالات کو تقویت دیتی ہے، جس کے نتیجے میں تصدیقی تعصب کی غیر ارادی مشق ہو سکتی ہے۔ ایکو چیمبرز سماجی اور سیاسی پولرائزیشن اور انتہا پسندی کو بڑھا سکتے ہیں۔ سوشل میڈیا پر، یہ خیال کیا جاتا ہے کہ ایکو چیمبر متنوع نقطہ نظر کی نمائش کو محدود کرتے ہیں، اور مفروضہ بیانیوں اور نظریات کی حمایت اور تقویت کرتے ہیں۔" میں نے کوشش کی ہے کہ قابل فہم زبان میں آپ کو ایکو چیمبرز تھیوری سے متعارف کرایا جائے چلیں اب عام فہم انداز میں سمجھاتے ہیں کہ ایکو چیمبر کا تصور کیا ہے۔ ایکو چیمبر کی صورتحال اس وقت پیدا ہوتی ہے جب آپ ایک ہی جیسے خیالات و نظریات کے لوگوں کے درمیان گم ہو جاتے ہیں ایک ہی نظریے کے لوگوں کی باتیں سنتے ہیں اور انہی پر یقین کر کے اسے سچ سمجھ کے اس کی ترویج کرنا شروع کر دیتے ہیں۔ اس ایکو چیمبر میں مخالف آواز یا تو داخل نہیں ہونے دی جاتی یا پھر اسے نکال دیا جاتا ہے۔ اس وقت آپ دیکھیں گے کہ فیس بک، ٹوٹر پر یا تو آپ ہم خیال لوگوں کی فیڈ دیکھ رہے ہوتے ہیں یا پھر اپنے ہم خیال لوگوں کے ساتھ مل کر کسی مخالف آواز کی مخالفت کر رہے ہوتے ہیں۔ یہ صورتحال ایک پرتشدد معاشرت کی صورت اختیار کر لیتی ہے اور جب آپ اس آن لائن ایکو چیمبر سے اپنی حقیقی دنیا میں اس صورت واپس واپس آتے ہیں کہ آپ ایک بار بار گونجتی آواز کو سچ سمجھ چکے ہوتے ہیں۔ یہ صورتحال اس وقت بدتر ہو جاتی ہے جب آپ ہم خیالوں کے ایک گروپ کو جوائن کرتے ہیں۔ اگلے مرحلے میں ہم سرچ ببل کے بارے میں بات کرتے ہیں۔ سرچ ببل منظم پراپوگنڈہ کی ایک ایسی طاقت ہے جسے مارکیٹنگ کی دنیا میں سب سے خطرناک ہتھیار مانا جاتا ہے ماہرین کا ماننا ہے کہ کوئی بھی میسج جب آپ کو تین سے زیادہ ذرائع سے ملے تو آپ کے اسے ماننے اور یقین کرنے کا چانس بڑھ جاتا ہے جب ٹک ٹاک، فیس بک، ٹویٹر، یوٹیوب، ٹی وی ہر جگہ پر ایک ہی پیغام آئے گا تو کیا نتیجہ ہوگا؟ کہنے کو تو آج کی دنیا ”انفارمیشن ایج” ہے مگر سوشل میڈیا کی سائنس ایسی کہ ہر بندے کا ایک search bubble ہے جو اس کی آن لائن ایکٹویٹی کے algorithm سے بنتا ہے فیک نیوز میں ہمیشہ ایسا عنصر ہوتاہے جو آپ کو جذباتی کر دے ماہرین سوشل میڈیا کا ماننا ہے کہ فیک نیوز کو پھیلانے اور قائل کرنے میں جذباتی کردینے والے چیزیں اہم کردار ادا کرتی ہیں جیسا کہ آپ کچھ دن سوشل میڈیا پر جانور بھی سرچ کریں تو ہر سوشل میڈیا پر آپ وائلڈ لائف ہی ملے گا ‏چاہے میڈیم کوئی بھی ہو یہی وہ پہلو ہے، جن پر ماہرین نفسیات، آئی ٹی کے ماہرین اور مارکیٹنگ کے ماہرین مل بیٹھ کر ایک بہترین سٹریٹجی بنا تے ہیں۔ آخری مرحلے میں ہم آپ کو بتائیں گے کہ پاکستان میں سوشل میڈیا کی جنگ کیسے لڑی جا رہی ہے اور کن حربوں سے اپنے اور مخالفین کو متاثر کیا جا رہا ہے یوں تو اس وقت تمام سیاسی جماعتوں اور انکے چھوٹے سے بڑے رہنماوں کے چھوٹے بڑے میڈیا سیل کام کر رہے ہیں لیکن تحریک انصاف کے علاوہ کسی دوسری جماعت نے سوشل میڈیا کو اتنا منظم نہیں کیا جتنا اس نے ادارہ جاتی طور پر اس میڈیم کو استعمال کیا ہے۔ باقی جماعتیں روایتی طور پر زیادہ تر مین اسٹریم میڈیا پر فوکس رکھتی ہیں لیکن پاکستان تحریک انصاف ان سے ایک قدم آگے ہے۔ 2013 کے الیکشن سے پہلے تحریک انصاف کا سوشل میڈیا زیادہ تر مخالفین کی ٹرولنگ اور بعض الزامات کے مطابق گالم گلوچ کیلئے استعمال ہوتا تھا۔ لیکن بعد ازاں اس جماعت نے اس میڈیم کو باقاعدہ ادارہ جاتی شکل دی اور اسے اپنے پراپیگنڈہ ٹول کے طور پر استعمال شروع کیا۔ چونکہ اس جماعت میں کارپوریٹ کے لوگوں کی ایک بڑی تعداد شامل ہوئی جو نا صرف پڑھی لکھی بلکہ جدید علوم سے آشنا تھی اس لئے تحریک انصاف نے نوجوانوں کے لیے سوشل میڈیا ماہرین کی مدد سے ایسے جذباتی میسج تخلیق کیے کہ وہ ان کا Search Bubble اس طرح بن گئے کہ وہ صرف ایک ہی طرح کے پیغامات ہی دیکھ سکتے ہیں یعنی ان کی سوشل میڈیا اور معلومات Algorithms کی مدد سے محدود کر دی گئی ہیں۔ یہ کارنامہ باقاعدہ ایکو چیمبر اور سرچ ببل کی مہارت کو استعمال کر کے سرانجام دیا گیا۔ اس پارٹی نے اپنے دور حکومت میں ترجمانوں کی ایک پوری فوج بھرتی کی جو مختلف ایشوز پہ ایک بیانیہ تشکیل دیتی جو ایک دوسری سوشل میڈیا ٹیم جس کے ہیڈ کا دفتر پرائم منسٹر ہاوس میں ہی تھا، پھیلانے کا فریضہ سرانجام دیتی۔ اس سوشل میڈیا ٹیم کو باقاعدہ سرکاری نوکریاں دی گئیں بلکہ ان کیلئے ایک سپیشل بجٹ منظور کیا گیا پاکستان کی 63 فیصد آبادی نوجوان ہے جو بچہ 2000 میں پیدا ہوا، آج 22 سال کا ہے اس نے اپنے سارے بچپن اور لڑکپن میں پاکستان کے سارے سیاستدانوں کو نہی دیکھا بلکے یہ سنتے گزارا کہ سوائے عمران خاں کے باقی سارے چور ہیں وغیرہ وغیرہ۔ دنیا بھر کی نفسیات کی تحقیق اٹھا لیجئے ٹین ایج ہی وہ عمر ہے کہ جب آپ کی سوچ کی تشکیل ہوتی ہے جب آپ نظریات بدلتے ہیں جب آپکو چیزوں کی پہچان ہوتی ہے اس عمر کو پی ٹی آئی نے ہر اس سورس سے اپروچ کیا جو ممکن تھی ٹک ٹاک، یو ٹیوب، فیس بک، انسٹا گرام، وٹس ایپ اور دیگر تمام سوشل میڈیا کے ادارے جو لوگو ں کے اذہان پر اثر انداز ہوسکتے ہیں انہیں استعمال کیا گیا۔ ٹین ایج کی آفاقی حقیقت یہ ہے کہ میرے دوست جو نظریہ رکھتے ہیں وہی میرا ہو گا۔ اس سب کو ڈیل کرنے کے لیے ماسوائے پی ٹی آئی کے کسی اور جماعت نے اس پر کام نہی کیا جس کا نتیجہ یہ نکلا ہے کہ نوجوانوں کی سوچ یکطرفہ ہوگئی ہے اور نوجوانوں کا ذہن اس یک طرفہ سوچ سے اس قدر متاثر ہوچکا ہے کہ وہ کوئی دوسری بات سننے کو سرے سے تیار ہی نہی۔ ان کے سامنے ہے کہ ملک معاشی تباہی کے دہانے پر کھڑا ہے اور پچھلے پونے چار سال میں پی ٹی آئی حکومت نے اس ملک کا جو ستیاناس کیا ہے وہ اسے ماننے کو تیار ہی نہیں۔ پچھلے کچھ سالوں میں جس طرح ذہن تیار کئے گئے ہیں یہ اسی کا نتیجہ ہے کہ اب ساری صورتحال جرمن قوم کے حالات سے مماثلت اختیار کرتی جارہی ہے۔ سب کو یاد ہوگا کہ نوے سال پہلے کی جرمن قوم ہم سے کہیں زیادہ باشعور اور پڑھی لکھی تھی۔ دنیاکے بہت سے بڑے مفکر اور فلاسفر وہیں پیدا ہو چکے تھے۔ ‏پھر دیکھتے ہی دیکھتے ایک شخص نے اسے اپنے حصولِ اقتدار کے خوشنما جال میں ایسا پھنسایا کہ پوری قوم اس پر مر مِٹی۔ ‏انجام ٹوٹل تباہی۔

معاشی استحکام کی سیاسی قیمت

معاشی استحکام کی سیاسی قیمت اظہر عباس یوکرین پر روس کے حملے نے نہ صرف یورپ بلکہ دنیا بھر کو اقتصادی زلزلوں کا شکار کیا ہے۔ پاکستان، جس کی معیشت دہائیوں کی غیر مستحکم طرز حکمرانی کی وجہ سے پہلے ہی کمزور ہے، خاص طور پر اسکا شکار ہوئی۔ اگرچہ بہت سے ممالک یوکرائنی یا روسی گندم یا غیر ملکی توانائی کی درآمدات پر انحصار کرتے ہیں، لیکن پاکستان دونوں کی کمی یوکرائن، روس اور مشرق وسطی سے پورا کرتا ہے۔اعداد و شمار بتاتے ہیں کہ 2020/ 2021 کے دوران پاکستان یوکرائنی گندم کی برآمدات کا تیسرا سب سے بڑا گاہک تھا۔ پاکستانی معیشت کو دوسرا بڑا جھٹکا تیل اور ایل این جی کی قیمتوں میں اضافے سے لگا، جس سے اس کی درآمدات تقریباً 5 بلین ڈالر تک پہنچ گئیں۔ پاکستانی معیشت کے لیے یہ ایک بد ترین صورتحال ہے۔ 30 جون 2022 کو پاکستان کے مالی سال کے اختتام پر، اس کا تجارتی خسارہ 50 بلین ڈالر کے قریب پہنچ گیا ہے، جو پچھلے سال کے مقابلے میں 57 فیصد زیادہ ہے۔ جون میں مہنگائی کی شرح 20 فیصد سے زیادہ ہو گئی جو کہ ماضی قریب میں سب سے زیادہ ہے۔ بین الاقوامی مالیاتی فنڈ کی طرف سے سبسڈی ختم کرنے کی ہدایت نے بجلی اور گیس دونوں کی قیمتوں میں ہوش ربا اضافہ کیا ہے۔ امریکی ڈالر کے مقابلے پاکستانی روپے کی قدر میں مسلسل کمی واقع ہو رہی ہے۔ پاکستانی روپے کی گراوٹ نے خاص طور پر متوسط ​​طبقے کو نقصان پہنچایا ہے اور موجودہ صورتحال میں متوسط ​​طبقہ مہنگائی کی صورتحال برداشت کرنے سے قاصر ہے۔ ان حالات میں جبکہ ملک اقتصادی بحران کی بدترین لپیٹ میں ہے پاکستان کے سب سے بڑے صوبے میں 20 سیٹس پر ضمنی الیکشن نے سیاسی سطح پر ایک نئے طوفان کو جنم دیا ہے۔ عمران خان جو عدم اعتماد کے ذریعے حکومت سے بے دخل ہوگئے تھے شروع دن سے ہی ایک ایجنڈے پر عمل پیرا ہیں کہ سیاسی بحران کو شدید کر کے نئے الیکشن کی راہ ہموار کر سکیں ان 20 صوبائی سیٹس میں سے 15 جیتنے کے بعد سیاسی بحران میں شدت پیدا کر کے وفاقی حکومت پر دباؤ بڑھاتے نظر آتے ہیں۔ عمران خان نے اپنی ساری کارکردگی ایک خط میں لپیٹ کر اپنے ووٹ بینک کو دی جس نے اس کو قبول کیا۔ اس کے بعد انہوں نے اینٹی امریکا نعرہ بھی بیچا۔ اور ان کے ووٹ بینک نے اس کو بھی ہاتھوں ہاتھ خریدا۔ یاد رہے عمران خان کے بیانیے کا خریدار ان کا ووٹ بینک اور اس کے علاوہ وہ نوجوان ووٹر ہے جس کی ہر حلقے میں 20/25 ہزار کے قریب نمائندگی ہے اور گزشتہ کچھ سالوں میں پاکستانی انتخابی سیاست میں نیا آیا ہے یہ نوجوان ووٹر سسٹم سے باغی ہے، اپنے آپ کو تبدیلی کا نمائندہ سمجھتا ہے اور اسے سوشل میڈیا سے رغبت ہے۔ اسے کوئی بھی بیانیہ دینا آسان ہے بقول ہمارے دوست عظمت افروز خان: ‏"نوجوان Fiction اور Thrill کے دلدادہ ہوتے ہیں، بچپن ہی سے بڑے بڑے خواب دیکھنے کے عادی ہوتے ہیں جبکہ چالیس پچاس سال کے لوگ بیشتر خواب ٹوٹنے کے بعد Pragmatic ہو چکے ہوتے ہیں, تجربہ کار ہو چکے ہوتے ہیں سو اُنہیں جھوٹے خواب بیچے نہیں جا سکتے، جبکہ نوجوان کے یہ جاگتے خواب اُسے سکون دیتے ہیں ، اسی لئے نیازی کے بیشتر ووٹر اٹھارہ سے پچیس سال کے وہ نوجوان ہیں جنہیں نیازی مسلسل جھوٹے خواب بیچ رہا ہے اور تاریخ سے نابلد نوجوان اس کے چنگل میں آسانی سے آ رہے ہیں، پھر نیازی کی ‏سوشل میڈیا ٹیمیں بھی اسی عمر کے نوجوانوں پر مشتمل ہیں جو اُن نوجوانوں کو اُن ہی کی “کھُلی ڈُلی” زبان میں بات سمجھاتے ہیں، مخالفین کو گالیاں دھمکیاں دلواتے ہیں نوجوانوں کو طاقتور ہونے کا احساس دلاتے ہیں۔" سیاسی میدان میں نووارد اس طبقے نے عمران خان کے بیانیے کو قبول کیا ہے اور اس وقت پاکستانی کی سیاست میں جو جوشیلا پن نظر آتا ہے وہ یہی نوجوان ووٹر ہے ‏اس سارے سیاسی غل غپاڑے میں ہم یہ بھول رہے ہیں کہ 2018 کے عام انتخابات میں یہ 20 سیٹس پی ٹی آئی نے جیتی تھیں۔ ان میں سے 4 نون لیگ نے جیت لی ہیں جبکہ 1 آزاد رکن نے نون لیگ میں شمولیت/ حمایت کا اعلان کر دیا ہے اس حکومت کے پاس کوئی جادو کا چراغ نہیں ہے کہ وہ ڈالر کو 120 اور پٹرول کو 100 روپے پر لا سکے۔ اس کے پاس کوئی جادو کا چراغ نہیں جو لوڈشیڈنگ کو فوری طور پر صفر کرسکے۔ یہ غیر یقینی کی صورتحال اب ڈالر کو مزید بے قابو کرے گی اور اس کا سادہ سا مطلب ہے کہ اگر عالمی منڈی میں تیل کی قیمتیں ذرا سی بھی اوپر گئیں تو حکومت کو یہاں بھی بڑھانا پڑیں گی۔ لیکن بقول وجاہت مسعود "پاکستان میں نئے ووٹروں کی اکثریت ہماری سیاسی اور جمہوری تاریخ سے نابلد ہے۔ معیشت کی نزاکتیں نہیں سمجھتی۔ اس نئی سوچ کا ماضی کی سیاسی روایت سے کوئی تعلق نہیں۔ ماننا چاہیے کہ پاکستان کا عام شہری مہنگائی کے حالیہ بحران سے سخت نالاں ہوا ہے۔ اسے آئی ایم ایف کی شرائط، زرمبادلہ کے ذخائر یا عالمی معیشت کے اتار چڑھائو سے غرض نہیں۔ وہ آٹے اور گھی کی قیمت جانتا ہے۔" سٹی گروپ کے ایمرجنگ مارکیٹس ڈویژن کے سابق چیف سٹریٹجسٹ یوسف نظر کا اندازہ ہے کہ فروری سے اب تک پاکستان کے زرمبادلہ کے ذخائر نصف کم ہو کر صرف 6.3 بلین ڈالر رہ گئے ہیں، یوسف نذر کے مطابق، پاکستان کو کسی بھی دوسرے ملک کے مقابلے میں زیادہ بین الاقوامی مالیاتی فنڈ (IMF) سے بیل آؤٹ ملے ہیں۔ ورلڈ بینک نے خبردار کیا ہے کہ پاکستان کو جلد ہی "میکرو اکنامک عدم استحکام" کا سامنا کرنا پڑ سکتا ہے۔ سماجی عدم استحکام اس کے علاوہ ہے پاکستان کے نجی شعبے نے لیبر پول کو جذب کرنے کے لیے اتنی ملازمتیں پیدا نہیں کیں۔ غصہ عروج پر پہنچ رہا ہے، اور بڑھتے ہوئے جرائم معاشرتی خرابی کی طرف اشارہ کرتے ہیں۔

بائیڈن کا دورہ مشرق وسطی - کیا ہونے والا ہے

عین اس وقت جب پاکستانی ‏سیاست پنجاب کے 20 صوبائی حلقوں، کراچی کی بارشوں، عمران خان کے کچھ اعترافی اور کچھ الزاماتی بیانات میں دھنسی ہوئی ہے، امریکی صدر جو بائیڈن مشرق وسطی کا دورہ مکمل کر چکے ہوں گے۔ اس دورہ میں جہاں انہوں نے جیو اسٹریٹیجک معاہدات کی تجدید کی وہیں معاشی میدان میں بھی کچھ تغیرات رونما ہوئے جنہیں شاید ہمارے سیاستدان اپنی راگنیوں میں مست رہنے کی بنا پر بھولے رہے یا پھر انہوں نے آئیندہ کیلئے اسے قومی سلامتی کے اداروں پر چھوڑ کر انہوں نے صرف اندرونی سیاست پر قناعت کرنے کا فیصلہ کیا ہے ایک سیاستدان کا اپنے ملک کے مفاد سے بڑا کوئی مفاد نہیں ہوتا. گزشتہ چند مہینوں میں پاکستان کے گرد بنیادی نوعیت کی بڑی تبدیلیاں وقوع پذیر ہو چکی ہیں اور مستقبل میں ان تبدیلیوں کی بنیاد پر بہت سی جغرافیائی تبدیلیوں کا امکان ہے، خلیج اور مشرق وسطیٰ جہاں پاکستان کے قریبی ممالک مصر، اردن، سعودیہ، خلیجی ممالک واقع ہیں پورا خطہ تبدیل ہو رہا ہے، لیکن ایک سیاستدان قوم کی توجہ مسلسل ہٹا رہا ہے. تمام سیاسی جماعتیں اس وقت ایک ایسے بخار میں مبتلا ہیں جس کا کوئی علاج اس وقت تک نا ممکن نظر آتا ہے۔ آئیے جائزہ لیتے ہیں کہ امریکی صدر کے دورہ مشرق وسطی میں کیا ہو چکا ہے اور کیا متوقع ہے۔ نیو یارک ٹائمز کےمطابق صدر جو بائیڈن بدھ کے روز مشرق وسطیٰ کے چار روزہ دورے پر اسرائیل اور سعودیہ جا رہے ہیں تاکہ ایران کے جوہری پروگرام کو کم کرنے، امریکی پمپوں تک تیل کی ترسیل کو تیز کرنے اور سعودی عرب کے ساتھ تعلقات کو نئے سرے سے تبدیل کرنے کی کوشش کی جا سکے۔ وہ ایک ایسے ولی عہد سے بھی ملیں گے جس پر اب تک انکی ڈیمو کریٹک پارٹی اور وہ خود انسانی حقوق کی کھلم کھلا خلاف ورزیوں کا الزام لگاتی رہی ہے۔ ماضی میں وہ ولی عہد کی بجائے براہ راست بادشاہ سے رابطے رکھنے کا ارادہ کرنے کا اظہار بھی کر چکے ہیں یہ تینوں کوششیں ایک ایسے صدر کے لیے سیاسی خطرات سے بھری ہوئی ہیں جو اس خطے کو اچھی طرح جانتا ہے، لیکن چھ سالوں بعد پہلی بار اس سے کہیں کم فائدہ کے ساتھ دورے پر آیا ہے جتنا وہ واقعات کی شکل دینا چاہتا ہے۔ 2015 کے ایران جوہری معاہدے کو بحال کرنے کے لیے ان کی 18 ماہ کی طویل بات چیت رک گئی ہے، جس سے تہران کو جوہری کلب سے باہر رکھنے پر مجبور کرنے کی سفارتی کوششوں میں رکاوٹ پیدا ہو گئی ہے، جس سے وہ زیادہ تر جوہری ایندھن کو اب قریب قریب بم گریڈ کی سطح تک بڑھانے کی کوشش کر رہا ہے۔ ولی عہد کی سفارتی واپسی میں نرمی کے انعام میں سعودی عرب نے اپنے تیل کی پیداوار بڑھانے پر آمادگی کا اظہار ان لفظوں میں کیا ہے کہ اس سے زیادہ اس کی استطاعت ہی نہی یعنی سعودی تیل کے کنویں اب اپنی پوری استطاعت سے پیداوار دیں گے اور چونکہ سعودی تیل کی فروخت ڈالر سے منسلک ہے تو اس سے امریکی معیشت میں نا صرف بہتری آئے گی بلکہ ڈالر کی قدر مستحکم رکھنے میں بھی مدد ملے گی بائیڈن انتظامیہ کے اہلکار جانتے ہیں کہ جب بائیڈن کی جانب سے سعودی عرب کو بین الاقوامی سطح پر نکو بنانے کے وعدے کے دو سال سے بھی کم عرصے کے بعد، ولی عہد شہزادہ محمد بن سلمان سے صدر کی ملاقات کی ناگزیر تصاویر سامنے آئیں گی تو انہیں اپنی ہی پارٹی کے اندر سے سخت تنقید کا سامنا کرنا پڑے گا۔ یہ وعدہ 2018 میں واشنگٹن پوسٹ کے ایک صحافی جمال خاشقجی کے ایک پیچیدہ سازش میں قتل کی وجہ سے ہوا تھا جس کے بارے میں سی آئی اے نے کہا تھا کہ اسے براہ راست ولی عہد نے منظور کیا تھا۔ لیکن محمد بن سلمان کی حکمت عملی - انتظار کرو جب تک کہ امریکہ کو دوبارہ سعودی عرب کی ضرورت نہ پڑے نے کام کیا بائیڈن نے اکثر تاریخ میں اس (اپنے) دور کو جمہوریت اور آمریت کے درمیان مقابلہ کے طور پر پیش کیا ہے، اور کیوبا اور وینزویلا کو ان کے جابرانہ طرز عمل کی وجہ سے لاس اینجلس میں امریکہ کے حالیہ سربراہی اجلاس سے روک دیا گیا ہے۔ لیکن انہوں نے سعودی عرب کے دورے کو حقیقت پسندی کی مشق قرار دیا ہے۔ بائیڈن نے گذشتہ ہفتے کے آخر میں واشنگٹن پوسٹ میں ایک رائے کے ٹکڑے میں لکھا ، "میرا مقصد تعلقات کو دوبارہ ترتیب دینا تھا - لیکن ٹوٹنا نہیں۔" سعودی "توانائی کے وسائل یوکرین میں روس کی جنگ کے عالمی رسد پر پڑنے والے اثرات کو کم کرنے کے لیے ناگزیر ہیں" اس سفر میں سپر پاور کی چالوں کا ایک عنصر بھی ہے۔ بائیڈن نے دفتر میں آنے کے بعد یہ واضح کیا کہ وہ مشرق وسطیٰ پر امریکی توجہ کو کم کرنا چاہتے ہیں، اور چین پر توجہ مرکوز کرنا چاہتے ہیں - ان کے اس یقین کی عکاسی کہ واشنگٹن نے 20 سال ضائع کیے جب اسے ایک حقیقی ہم مرتبہ حریف پر توجہ مرکوز کرنی چاہیے تھی۔ لیکن یہ سفر جزوی طور پر خطے میں چین کی مداخلت کو روکنے کے بارے میں بھی ہے۔ گزشتہ ہفتے، ریاض اور واشنگٹن نے خاموشی سے سعودی عرب میں اگلی نسل کے 5G سیلولر نیٹ ورک کی تعمیر پر تعاون کے لیے مفاہمت کی ایک یادداشت پر دستخط کیے تھے۔ یہ چین کے 5G چیمپئن، Huawei کو باکس آؤٹ کرنے کے لیے ڈیزائن کیا گیا ہے۔ یوکرائن کی جنگ کی سیاست بھی پس منظر میں ہوگی۔ بائیڈن کے معاونین نے واضح کیا کہ وہ موسم بہار میں اس وقت ناراض ہوئے جب اسرائیلی حکومت نے جنگ کے بارے میں بڑے پیمانے پر غیر جانبدارانہ موقف اختیار کرنے پر اصرار کیا، اس بات پر اصرار کیا کہ اس کے وزیر اعظم نفتالی بینیٹ کے لیے صدر ولادیمیر پوتن کے سامنے کھلی بات رکھنے کا یہی واحد راستہ ہے۔ پیر کو، جب بائیڈن جانے کی تیاری کر رہے تھے، ان کے قومی سلامتی کے مشیر، جیک سلیوان نے پہلی بار انکشاف کیا کہ انٹیلی جنس ایجنسیوں نے یہ نتیجہ اخذ کیا ہے کہ ایران - اسرائیل کا بنیادی مخالف - یوکرین کے خلاف جنگ میں روس کی مدد کرنے کا منصوبہ بنا رہا ہے۔ ان کا کہنا تھا کہ ایران روس کو سینکڑوں ڈرونز یا یو اے وی فراہم کرنے کی تیاری کر رہا ہے، جن میں سے کچھ حملوں کو انجام دینے کی صلاحیت رکھتے ہیں۔ عوامی استعمال کے لیے، وائٹ ہاؤس نے استدلال کیا ہے کہ بائیڈن کے سعودی عرب جانے کا فیصلہ صرف تیل ہی نہیں بلکہ قومی سلامتی کے مسائل کی ایک پوری رینج کی وجہ سے تھا۔ لیکن تیل درحقیقت گیس کی اونچی قیمتوں کے وقت سفر کی سب سے اہم وجہ ہے۔ اسی وجہ سے اب تک کی جو تصاویر میڈیا کو جاری کی گئی ہیں ان میں محمد بن سلیمان تو نظر نہیں آئے لیکن عراقی صدر اور یو اے ای کے حکمران صدر بائیڈن کے ساتھ خوشگوار موڈ میں دکھائی دئے دوسری طرف خطے کے دوسرے اہم عرب کھلاڑیوں کے ساتھ جدہ کانفرنس برائے امن و ترقی کے دوران شہزادہ محمد بن سلمان نے کانفرنس سے خطاب کرتے ہوئے کہا کہ تیل کی قیمتوں میں استحکام کیلئے ترسیل برقرار رکھنا انتہائی ضروری ہیں۔ ’تیل منڈی میں استحکام لانے کے لیے سعودی عرب نے اس سے پہلے ہی اپنی پیداوار کو 13 ملین بیرل تک لانے کا اعلان کر رکھا ہے‘۔ ہم امید ظاہر کرتے ہیں کہ کانفرنس سے عرب ممالک اور امریکہ کے درمیان تعلقات کے فروغ کا نیا باب کھلے گا۔ ’ہم ایران سے مطالبہ کرتے ہیں کہ وہ خطے کے ممالک کے اندرونی معاملات میں مداخلت نہ کرے‘۔ولی عہد نے کہا ہے کہ ’عراق میں امن و استحکام پورے خطے کے لیے ضروری ہے جبکہ شام اور لیبیا کے مسائل سے پورا خطہ متاثر ہے‘۔ جبکہ مصری صدر نے کہا کہ امریکا کے ساتھ وسیع البنیاد تعاون کے خواہاں ہیں۔ صدر بائیڈن نے کہا کہ ایران کی جوہری سرگرمیاں خطرہ، حلیفوں کے ساتھ مل کر خطے کو درپیش خطرات سے نمٹنے کا عزم رکھتے ہیں، مشرق وسطیٰ میں پائیدار تعلقات قائم کر کے مستحکم معیشت کی بنیاد ڈالیں گے۔ صدر جو بائیڈن نے اپنے خطاب میں کہا کہ ’ایران کو جوہری توانائی حاصل کرنے کی اجازت نہیں دیں گے۔‘ سبق ویب سائٹ کے مطابق انہوں نے کہا ہے کہ ’ایران کی جوہری سرگرمیاں خطے کی امن وسلامتی کے لیے خطرہ ہیں۔‘’ہم اپنے حلیفوں کے ساتھ مل کر خطے کو درپیش خطرات سے نمٹنے کا عزم رکھتے ہیں‘۔ انہوں نے کہا ہے کہ ’ہم مشرق وسطی میں پائیدار تعلقات قائم کرکے مستحکم معیشت کی بنیاد ڈالیں گے۔‘ امریکی صدر کا کہنا تھا کہ ’خطے کے امن واستحکام کو نقصان پہنچانے کی اجازت نہیں دیں گے اور نہ ہی زبردستی سرحدوں میں تبدیلیاں ہونے دیں گے‘۔ ’بحری تجارتی گزرگاہوں کو محفوظ رکھنا ہماری اولین ترجیح ہے۔ ہم بحری راستوں کو محفوظ بنائیں گے‘۔ جوابی تحفے میں سعودی عرب کو امریکا نے تیران اور صنافیر جزائر کی ملکیت سے نوازا ہے جہاں اس کی امن افواج نے کنٹرول سنبھالا ہوا تھا اسرائیل، مصر اور سعودی عرب کے قریب بحیرہ احمر میں واقع جزائر اہمیت کے حامل ہیں۔ سعودی عرب اور مصر کے درمیان نصف صدی سے زائد عرصے سے ان جزائر پر ملکیت کا تنازع ہے۔ میڈیا رپورٹس کے مطابق اب اسرائیل نے بھی جزائر کو سعودی عرب کو واپس کرنے سے متعلق اعتراض واپس لے لیا ہے، اسے اسرائیل سعودیہ تعلقات میں بڑی پیش رفت قرار دیا جا رہا ہے۔ سعودی عرب پہلے ہی اپنی فضائی حدود اسرائیل کیلئے کھول چکا ہے معاشی میدان میں دوسری بڑی پیش رفت I2U2 نامی معاہدہ ہے تجزیہ کاروں کا کہنا ہے کہ I2U2 ایشیا اور مشرق وسطیٰ میں چین کے اثر و رسوخ کو روکنے کے لیے امریکہ کی کوششوں کو تقویت دیتا ہے، مشرق وسطیٰ کے رہنماؤں کو خطے کے لیے واشنگٹن کی وابستگی کا یقین دلاتا ہے اور دنیا کے مختلف حصوں میں اپنے اتحادیوں کے درمیان بہتر تعلقات قائم کرتا ہے۔ اس معاہدے کو کواڈ کا ایک ساتھی منصوبہ سمجھا جاتا ہے، ایک چار طرفہ شراکت داری جو آسٹریلیا، بھارت، جاپان اور ریاستہائے متحدہ کو ایک ساتھ ملاتی ہے جس کی بنیاد جزوی طور پر بحر الکاہل میں بڑھتے ہوئے چینی اثر و رسوخ کے جواب میں رکھی گئی تھی۔ اسرائیل کے لیے، I2U2 ایک اور فورم ہے جس میں ایران کی مخالفت کو آگے بڑھانے کے ساتھ ساتھ اس تاریخی سفارتی معاہدے کو مضبوط کرنا ہے جس پر اس نے U.A.E. کے ساتھ مہر ثبت کی تھی۔ اس معاہدے کی تشکیل کے ساتھ، "ایسا محسوس ہوتا ہے کہ بائیڈن انتظامیہ دو الگ الگ اسٹریٹجک سیاق و سباق کو مربوط کرنے کی کوشش کر رہی ہے" - ہند-بحرالکاہل اور مشرق وسطی، چین اور ایران کے ساتھ اسرائیل کے تعلقات پر ایک حالیہ مقالے کے مصنف کیوجن لم نے کہا۔ ڈاکٹر لم نے مزید کہا کہ "یہ مختلف خطوں میں امریکہ کے شراکت داروں کے درمیان صف بندی کرنے کی کوشش کر رہا ہے۔ ہندوستان کے لیے، مقصد بنیادی طور پر اقتصادی ہے۔ اس اقدام سے دہلی کو مارچ میں ایک بڑے اقتصادی معاہدے پر مہر لگنے کے بعد امارات کے ساتھ تجارتی تعلقات کو تقویت ملتی ہے، اور اسرائیل کے ساتھ تجارتی معاہدے کے لیے بات چیت کو رفتار ملتی ہے۔ تقریباً 3.5 ملین ہندوستانی امارات میں رہتے ہیں، جو خلیجی ملک کی کل آبادی کا تقریباً ایک تہائی ہے، جو انہیں U.A.E کے لیے مزدوری کا ایک اہم ذریعہ بناتا ہے۔ اور ہندوستان کے لیے ترسیلات۔ ہندوستان کو امارات سے تیل اور اسرائیل سے اسلحہ بھی خاصی مقدار میں ملتا ہے۔ گزشتہ ہفتے ایک پریس بریفنگ میں، وائٹ ہاؤس کے ایک اہلکار نے کہا کہ I2U2 اپنے شرکاء کو خوراک کی حفاظت پر بات کرنے کی بھی اجازت دے گا۔ یوکرین میں روس کی جنگ نے اناج کی سپلائی میں کمی پیدا کر دی ہے، یہ فرق بھارت کے حالیہ گندم کی برآمدات کو محدود کرنے کے فیصلے سے بڑھ گیا ہے۔ انڈیا اس سمٹ کے فورا بعد حیفہ کی بندرگاہ کے انتظام خریدنے میں کامیاب رہا۔ ایک قاری اس تمام پیش رفت کے بعد اپنے سیاست دانوں اور اسٹیبلشمنٹ سے کم از کم ایک سوال پوچھنے میں تو حق بجانب ہوگا کہ "اس خطے میں ہم کہاں کھڑے ہیں ؟" یا پھر خواجہ آصف کے اس بیان پر اکتفا کر لیا جائے کہ "بھکاریوں کی کوئی چوائس نہیں ہوتی" ؟

پاکستان کی انتخابی تاریخ اور اسٹیبلشمنٹ کے سبق

پاکستان کی انتخابی تاریخ اور اسٹیبلشمنٹ کے سبق اظہر عباس پاکستان کی انتخابی تاریخ جہاں دھاندلی کے الزامات اور اسٹیبلشمنٹ کی مداخلت بوالعجمیوں سے تعفن زدہ ہے وہاں ہماری نوجوان نسل بلکہ بہت سارے بزرگان بھی اس سے ناواقف ہیں کہ قومی سطح بالغ رائے دہی کا حق ہمارے ہاں 1970 کے الیکشن میں ہی پہلی بار دیا گیا۔ 1947 سے 1958 کے دوران پاکستان میں قومی سطح پر براہ راست انتخابات کبھی نہیں ہوئے۔ یعنی عام عوام نا ووٹ کے حقدار تھے اور نا ہی حکومتوں کے بننے بگڑنے سے ان کا براہ راست کوئی تعلق رکھا گیا۔ اشرافیہ اس دوران اس ملک کے معاملات براہ راست بناتی بگاڑتی رہی۔ قومی سطح پر 1958 کے بعد پاکستان کے دوسرے صدارتی انتخابات 2 جنوری 1965 کو ہوئے۔ ووٹنگ بالواسطہ ہوئی یعنی صدر کے انتخاب کیلئے 80,000 "بنیادی جمہوریتوں" کا الیکٹورل کالج بنایا گیا تھا۔ یعنی ووٹ کا حق 80،000 لوگوں کو دیا گیا جو کہ اس دور میں موری ممبر کے نام سے مشہور ہوئے انتخابات میں دو بڑی جماعتیں حصہ لے رہی تھیں: کنونشن مسلم لیگ اور مشترکہ اپوزیشن پارٹیاں۔ مشترکہ اپوزیشن جماعتیں پانچ بڑی اپوزیشن جماعتوں پر مشتمل تھیں، اور ان کا نو نکاتی پروگرام تھا، جس میں پارلیمانی جمہوریت کی بحالی اور براہ راست انتخابات اور بالغ رائے دہی کا تعارف شامل تھا۔ مشترکہ اپوزیشن جماعتوں کے پاس کوئی واحد قیادت نہیں تھی لہذا، انہوں نے فاطمہ جناح کو اپنے امیدوار کے طور پر چنا جنہیں بابائے قوم محمد علی جناح کی بہن ہونے کی وجہ سے ایک غیر متنازعہ رہنما کے طور پر دیکھا جاتا تھا۔ کنونشن مسلم لیگ کے امیدوار موجودہ صدر محمد ایوب خان تھے۔ ایوب خان 1958 میں پاکستانی فوجی بغاوت کے اعلان کے بعد اقتدار میں آئے تھے۔ تب سے وہ صدر کے عہدے پر فائز تھے۔ انتخابی مہم کا ایک ماہ کا مختصر دورانیہ تھا، جسے مزید نو پروجیکشن میٹنگز تک محدود کر دیا گیا جو کہ الیکشن کمیشن نے منعقد کیے تھے اور ان میں صرف الیکٹورل کالج کے اراکین اور پریس کے اراکین نے شرکت کی تھی۔ عوام کو پروجیکشن میٹنگز میں اس وجہ یا خوف سے شرکت سے روک دیا گیا کہ فاطمہ جناح کی فیم میں اضافہ ہوتا۔ فاطمہ جناح فاطمہ جناح کی مہم کو کئی دھچکوں کا سامنا کرنا پڑا۔ ایک غیر منصفانہ اور غیر مساوی انتخابی مہم اور بنیادی جمہوریت کے نظام کے ذریعے بالواسطہ انتخابات اس کے کچھ بنیادی مسائل تھے۔ تاہم، انہیں عوام میں زبردست حمایت حاصل تھی۔ بہت سے لوگوں کو ان سے ہمدردی تھی کیونکہ وہ محمد علی جناح کی بہن تھیں، جب کہ دوسروں نے انہیں ایوب خان کی فوجی آمریت کو چیلنج کرنے کے لیے ایک بہترین شخصیت کے طور پر دیکھا۔ اگرچہ بہت سے علما نے اس کی مذمت کی تھی کہ ایک عورت مسلم ریاست کی قیادت نہیں کر سکتی، کئی مذہبی رہنماؤں نے بھی ان کی حمایت کی۔ مودودی کی زیرقیادت جماعت اسلامی، محترمہ جناح کی مہم کی گہری حامی تھی کیونکہ وہ سیکولر ایوب خان کے مقابلے میں مذہبی نظریات سے متاثر قدامت پسند تھیں۔ انتخابی نتائج حسب توقع موجودہ صدر ایوب خان کے حق میں آئے، جنہوں نے پاپولر ووٹ کھونے کے باوجود 62.43 فیصد الیکٹورل ووٹ حاصل کیے۔ فاطمہ جناح نے الیکٹورل کالج کے 35.86 فیصد ووٹ حاصل کیے۔ تاہم محترمہ جناح ملک کے کچھ علاقوں میں انتہائی کامیاب تھیں۔ انہیں نے کراچی اور ڈھاکہ جیسے بڑے شہری مراکز میں اکثریت حاصل کی۔ ایوب کو مشرقی پاکستان میں بھی مایوس کن نتائج کا سامنا کرنا پڑا۔ تاہم، ایوب نے دیہی پاکستان میں فیصلہ کن فتح حاصل کی۔ چونکہ الیکٹورل کالج کی اکثریت دیہی سیٹ اپ کے نمائندوں پر مشتمل تھی، اس لیے ایوب واضح اکثریت حاصل کرنے میں کامیاب رہے۔ 1947 تا 1970 عوام کی کارہائے حکومت میں عدم شمولیت کی وجہ سے عوام میں جو احساس محرومی پیدا ہوا اسے علیحدگی پسند عناصر نے پر کیا اور پاکستان کو اس کا خمیازہ 1970 کے انتخابات کے نتائج کی صورت میں بھگتنا پڑا۔ 1970 کے پاکستانی عام انتخابات، برطانوی ہندوستان سے پاکستان کی آزادی کے بعد پہلے براہ راست عام انتخابات تھے۔ دہائیوں کی طویل جدوجہد کے بعد، فوجی حکومت جمہوری طور پر منتخب عہدیداروں کو اقتدار منتقل کرنے کے پراسس کو شروع کرنے پر مجبور ہوئی۔ مشرقی پاکستان میں، انتخابات کو پاکستان کے بنگالی شہریوں کے لیے خود مختاری پر ریفرنڈم کے طور پر پیش کیا گیا، جو پاکستان کی آبادی کا تقریباً 55 فیصد تھے۔ یہ انتخاب عوامی لیگ نے جیتا، جس کی 313 میں سے 167 نشستیں تھیں، اور شیخ مجیب الرحمان پاکستان کے پہلے جمہوری طور پر منتخب ہونے والے وزیر اعظم بننے والے تھے۔ لیکن فوجی حکومت نے منتخب پارلیمنٹ کو اقتدار منتقل کرنے سے انکار کر دیا، جس کے نتیجے میں بنگلہ دیش کی آزادی کی کے نعرے سے شروع ہوئی تحریک 1971 میں ملک ٹوٹنے پر منتج ہوئی۔ ہماری اسٹیبلشمنٹ نے 1971 کے بعد اور روس کے زوال سے 2 سبق سیکھے ہیں: 1۔ سیاست کو اپنے کنٹرول میں رکھنا 2۔ وسائل کو اپنے کنٹرول میں رکھنا آپ دیکھیں گے کہ یہی 2 اسباب تمام مسائل کی جڑ ہیں جب تک ان کا حل نہیں نکلے گا تب تک یہ ملک ایسے ہی چلے گا اور اسٹیبلشمنٹ کے ساتھ چلنے والوں کے وارے نیارے اور قوم خستہ حال ہی رہے گی۔ ان سے نکلنے کیلئے جو بھی کوشش کرے گا اسکا حال "مجھے کیوں نکالا" ہو گا یا پھانسی لگے گا یا گولی کھائے گا۔ اس کے کارکن کوڑے کھائیں گے یا وطن بدری ان کا مقدر ٹھہرے گی۔ لیکن آپ یقین رکھیں جس طرح اس ملک میں اشرافیہ، عام عوام اور غریب عوام کی کلاس ابھر کر سامنے آ رہی ہے جلد اس کا نتیجہ سامنے آنے والا ہے- اس ملک میں ایک لا وارث نسل بھی تیار ہو رہی ہے جس کی نا تربیت کی گئی ہے نا یہ نسل تعلیم و دین کے نام سے واقف ہے اور یہ ایک سروے کے مطابق 6% ہے ۔ یہی 6% آپ کو ہر اخلاقی برائی اور سانحے کی ذمہ دار نظر آئے گی۔ یہ ملک بہت تیزی کے ساتھ ایک معاشرتی بحران کیطرف جا رہا ہے اور اس کے ذمہ دار آپ میں اور یہ معاشرہ ہے

پاکستان کا سیاسی گرداب

 پاکستان کا سیاسی گرداب

اظہر عباس

جیسا کہ میں نے پچھلے بلاگ میں لکھا تھا کہ جو بائیڈن ہاٹ پرسوٹ کی بجائے دنیا میں روایتی 80 کی دہائی کی سیاستکاری بذریعہ سفارتکاری کی اسٹریٹیجی پر جائے گا اور دنیا میں ڈیموکریٹک قوتوں کے ساتھ کام کرنے کو ترجیح دے گا لیکن بدقسمتی سے پاکستان کا حکمران طبقہ اس تبدیلی کو سمجھنے میں ناکام رہا ۔ ٹرمپ کے پاپولر سیاسی اسٹائل کو دیکھتے ہوئے عمران خان کو حکومت میں لایا گیا جس نے ٹرمپ سے قریبی مراسم بذریعہ اس کے داماد کشنر بڑھائے اور پھر ٹرمپ کو دورہ امریکہ میں بھرپور تعاون کی یہاں تک یقین دہانی کرائی گئی کہ پاکستانی سفارتخانہ کو ٹرمپ کا الیکشن آفس بنا دیا گیا ۔ یہ بات ڈیمو کریٹک پارٹی کو شروع سے کھٹک رہی تھی کہ ریپبلکن پارٹی کی حمایت میں پاکستان کس طرح سے تعاون کر رہا ہے ۔۔ یہاں رک کے ایک بات سوچیں کہ جب آپ ایک سپر پاور کے ملک میں جاکر ایک پارٹی کی ان کے الیکشن میں مدد کریں تو جوابی کاروائی سے بدکنا چہ معنی دارد ؟ اور وہ بلاشرکت غیرے سپر پاور جب آپ کے سفیر کو جوابی طور پر رجیم کے بدلاو کی بات کرے تو اس پر رونا کیسا ؟ اس ساری صورتحال میں جب کہ پاکستان کی حکومت و اسٹیبلشمنٹ اپنے سارے انڈے امریکہ کی ایک ہاری ہوئی پارٹی کی ٹوکری میں ڈال چکی تھی تو جیتی ہوئی پارٹی کے ایک اسسٹنٹ سیکرٹری کی ایک گھرکی کی مار ہی ثابت ہوئی اور جب عدم اعتماد اسمبلی میں پیش ہوئی تو ایک بھونڈے طریقے سے اپنی ہی حکومت توڑنی پڑی ۔۔ یہ بھونڈا انداز اتنا ناقابل فہم تھا کہ پورا ملک ایک آئینی و سیاسی گرداب میں پھنسا ہوا ہے ۔۔ ان حالات میں پاکستان کے معروف صحافی اپنے آج کے جنگ میں شائع شدہ کالم میں لکھتے ہیں کہ:

"افسوس صرف اس بات کا ہے کہ ہم سب سے زیادہ دنیا دیکھنے والے، مغرب کو سب سے زیادہ سمجھنے والے، اخلاقیات کا سبق دیتے کرکٹ لیجنڈ وزیراعظم عمران خان نے اسپورٹس مین اسپرٹ کا مظاہرہ نہیں کیا ورنہ وہ استعفیٰ دے کر ایک اعلیٰ مثال بھی قائم کر سکتے تھے۔

کھلاڑی آخری بال تک ضرور لڑتا ہے مگر ہار جائے تو شکست تسلیم بھی کرتا ہے۔مجھے کرکٹ دیکھنے کا جنون کی حد تک شوق رہا ہے اور اسپورٹس مین اسپرٹ کے حوالے سے میں عمران کے کزن ماجد خان سے بہت متاثر ہوں۔ اسے جب بھی لگتا تھا کہ بال اس کے بلے کو چھو کر وکٹ کیپر کے پاس گئی ہے تو وہ ایمپائر کی انگلی کی طرف دیکھے بغیر کریز چھوڑ دیتا تھا۔ 

اتوار کے روز قومی اسمبلی میں چار منٹ کا جو تماشہ ہوا اس نے بہت سے سنجیدہ سوالات کو جنم دیا ہے۔

حکومت اتنی جلدی میں تھی کہ ڈپٹی اسپیکر رولنگ پڑھتے وقت اسپیکر اسد قیصر کا نام بھی لے گئے جن کیخلاف عدم اعتماد کی تحریک اسی دن جمع ہو گئی تھی۔ یہی کام ذرا بہتر انداز میں اپوزیشن کے ایک دو لوگوں کو سن کر ہی کرلیتے۔

وزیراعظم اور ان کے رفقاء کار نے 8 مارچ سے لے کر 27مارچ تک پوری کوشش کی کہ منحرفین واپس آجائیں، اتحادی مان جائیں اور انہیں پورا یقین تھا کہ وہ تحریک کو شکست دینے میں کامیاب ہو جائیں گے۔

اب اگر ’بین الاقوامی سازش‘ کا پتا انہیں 7مارچ کو چل گیا تھا تو پھر یہ ساری کوششیں کس لیے تھیں۔ یہ انکشاف اس وقت کیوں کیا گیا جب تمام تر ذاتی ملاقاتوں اور پارٹی رہنمائوں کی کوششوں کے باوجود کوئی واپس آنے کو تیار نہ ہوا۔ پھر جیسا کہ ہوتا ہے، آپ نے منحرفین کے گھر والوں تک کو دھمکی دیدی مگر وہ پھر بھی واپس نہ آئے۔ اس سے بہت بہتر ہوتا کہ کپتان اکثریت کھونے کے بعد میدان میں مقابلہ کرتے۔ الیکشن میں جانے کے علاوہ آپ کے پاس کوئی راستہ ہی نہیں تھا کیونکہ دوسری طرف 190 سے زیادہ اراکین تھے۔

آخر خان صاحب یہ بھی تو بتائیں کہ ان منحرفین کو پارٹی میں لانے کا فیصلہ کس کا تھا؟ اتحادیوں کو کس نے آپ کے حوالے کیا تھا ساری زندگی ’’نیوٹرل ایمپائر‘‘ لانے کا کریڈٹ لینے والے کپتان کو اب نیوٹرل جانور کیوں نظر آنے لگے۔"

ان کے اس سوال کا جواب سلیم صافی دیتے ہیں۔ اپنے آج کے کالم میں لکھتے ہیں کہ:

مختلف ممالک سے پاکستان کے سفارتخانے دو ذرائع سے اپنی وزارتِ خارجہ کو باخبر رکھتے ہیں۔ ایک معمول کے خطوط ہوتے ہیں اور دوسرے خفیہ ٹیلی گرام۔

خفیہ ٹیلی گرام میں سفیر اس ملک کے عوام اور حکومتی صفوں میں پاکستان کے بارے میں سوچ کا تجزیہ اپنے الفاظ میں کرتے ہیں۔ بالخصوص جب بھی کسی بھی ملک کے حکومتی عہدیدار سے سفیر کی ملاقات ہوتی ہے تو ان کے خیالات کا خلاصہ خفیہ کیبل کی صورت میں بھجوایا جاتا ہے۔

 ظاہر ہے اس میں اس سفیر کے اپنے خیالات اور تجزیاتی صلاحیت کا بھی دخل ہوتا ہے۔

امریکہ، چین، انڈیا، برطانیہ اور افغانستان جیسے ممالک سے نہ صرف یہ کیبلز تواتر کے ساتھ آتے ہیں بلکہ ان ممالک کی اہمیت کی وجہ سے انہیں خصوصی اہمیت بھی دی جاتی ہے۔

 میری معلومات کے مطابق یہ خفیہ ٹیلی گرام براہ راست سیکرٹری خارجہ کو بھیجے جاتے ہیں اور ان کے ساتھ ساتھ آرمی چیف، ڈی جی آئی ایس آئی اور سی جی ایس کو بھی اسی روز بھیجے جاتے ہیں۔

یوں حکومت نے اس وقت جس خفیہ کیبل کو موضوع بحث بنایاہے، وہ اسی دن آرمی چیف، ڈی جی آئی ایس آئی اور سی جی ایس کو بھی گیا ہوگا اور اگر واقعی اس میں پاکستان کی سلامتی سے متعلق کوئی سنجیدہ خطرے کی بات ہوتی تو نہ صرف وہ اس پر ردعمل ظاہر کرتے بلکہ یہ شخصیات وزیراعظم سے کابینہ کی نیشنل سیکورٹی کمیٹی کی میٹنگ طلب کرنے کا بھی مطالبہ کرتیں۔

پاکستان کے بارے میں امریکی یہ بھی جانتے ہیں کہ اگر دھمکی دینی ہو یا پھر کوئی پیشکش کرنی ہو تو عسکری قیادت کوکی جاتی ہے نہ کہ وزیر خارجہ یا وزیراعظم کو۔

مثلاً جب زلمے خلیل زاد ہر ہفتے پاکستان آتے تھے تو کبھی ایسا نہیں ہوا کہ وہ آرمی چیف اور ڈی جی آئی ایس آئی سے نہ ملے ہوں لیکن وزیرخارجہ اور وزیراعظم سے وہ صرف ایک مرتبہ ملے۔ میں پورے دعوے سے کہہ سکتا ہوں کہ یہ بات بالکل جھوٹ ہے کہ سی آئی اے چیف جب پاکستان آئے تھے تو عمران خان نے ان کے ساتھ ملاقات سے انکار کیا تھا بلکہ حقیقت یہ ہے کہ عمران خان کو ان کی پاکستان آمد اور آرمی چیف اور ڈی جی آئی ایس آئی سے ملاقات پتہ ہی تب چلاجب وہ پاکستان سے واپس جا چکے تھے۔

 اس پس منظر کو سامنے لانے سے مقصود یہ ہے کہ امریکہ کو اگر کوئی سنجیدہ پیغام دینا ہوتا تو وہ براہ راست عسکری قیادت کو دیتا نہ کہ وہاں پر موجود ہمارے سفیر کو۔

اب یہ تو ہم سب جانتے ہیں کہ اس وقت امریکہ پاکستانی ریاست سے ناراض یا نالاں ہے۔ ایک وجہ تو افغانستان ہے۔

 دوسری وجہ یہ ہے کہ امریکہ کی خواہش ہے کہ پاکستان ماضی کی طرح صرف اس کے کیمپ میں رہے لیکن جنرل کیانی اور آصف زرداری کے دور میں پاکستان نے روس اور چین کے ساتھ اسٹریٹجک تعلقات کا آغاز کرکے یہ پیغام دیا تھا کہ پاکستان مزید امریکہ کی طرف نہیں دیکھے گا۔ اس دور میں صرف امریکہ کے خلاف برائے نام نعرے نہیں لگائے گئے تھے بلکہ نیٹو سپلائی بند کی گئی، بلوچستان میں ان کے اڈے واپس لیے گئے اور سپلائی تب بحال کی گئی جب امریکہ نے معافی مانگ لی۔

جنرل قمر جاوید باجوہ بھی اسی پالیسی کو لے کر آگے بڑھ رہے ہیں، اسی طرح سی پیک اور چین کے ساتھ قربت سے بھی امریکہ خوش نہیں اور چین کے تناظر میں اس نے انڈیا کو اپنے اسٹریٹیجک پارٹنر کا درجہ دیا ہے۔

اب صورت حال یہ ہے کہ امریکہ کے اسسٹنٹ سیکرٹری آف ا سٹیٹ برائے جنوبی ایشیا ڈونلڈ لو سے امریکہ میں تعینات پاکستانی سفیر اسد مجید خان نے 7 مارچ کو الوداعی ملاقات کی۔

میری معلومات کے مطابق اس ملاقات میں ان کے ساتھ ایک اور سفارتکار بھی موجود تھے اور وہ بھی پاکستان میں اپنے باسز کو بتا چکے ہیں کہ ایسی کوئی بات نہیں ہوئی جس طرح حکومت پیش کررہی ہے۔

 اس ملاقات میں شاید انہوں نے روایتی طور پر پاکستان سے متعلق روایتی گلے شکوے کئے ہیں چونکہ ٹرم خان ایڈمنسٹریشن کا استعمال ہوتا ہے اس لیے شاید اس ملاقات میں بھی انہوں نے یہ ذکر کیا ہے۔

اس طرح کی ملاقاتوں میں عموماً دونوں ملکوں کی سیاسی صورت حال بھی ڈسکس ہوتی ہے چنانچہ ہوسکتا ہے پاکستان کی سیاسی صورت حال پر بھی بات چیت ہوئی ہو اور ڈونلڈ لو نے یہ بتایا ہو کہ عمران خان ایڈمنسٹریشن کی موجودہ پالیسیوں کے ساتھ تو چلنا مشکل ہے لیکن نئی حکومت نے اگر کچھ مثبت اقدامات لیے تو ان کے ساتھ کام ہوسکتا ہے۔

 پھر اس طرح کی ملاقاتوں میں ہر ملک اپنے مطالبات دہراتا ہے اور جواب میں سفیر اپنے ملک کا موقف پیش کرتا ہے۔

 بعض اوقات وہ عہدیدار مطالبات پورے نہ ہونے کی صورت میں ممکنہ نتائج کا بھی ذکر کرتا ہے اور حکومت جو تاثر دے رہی ہے اس سے بظاہر یوں لگتا ہے کہ شاید ڈونلڈ لو نے ممکنہ نتائج کا بھی ذکر کیا ہو۔

اب اس ملاقات کا خلاصہ اور تجزیہ اسد مجید خان نے پاکستان بھجوایا اور ظاہر ہے کہ یہ اسی روز سیکرٹری خارجہ کے ساتھ مذکورہ عسکری حکام کے پاس بھی گیا ہوگا.

 لیکن ہم نے دیکھا کہ حکومت نے اس کے بعد کئی روز تک اس حوالے سے نہ تو امریکہ سے کوئی احتجاج کیا اور نہ کابینہ کی قومی سلامتی کمیٹی کا اجلاس بلایا کیونکہ وہ معمول کا ایک ٹیلی گرام تھا۔ کئی روز تک حکومت نے اس ٹیلی گرام کا کسی فورم پر کوئی ذکر نہیں کیا لیکن جب عدم اعتماد کی تحریک پیش ہوئی تو عمران خان صاحب نے اپوزیشن کو مدافعتی پوزیشن پر لانے کے لیے اس ٹیلی گرام کا سہارا لے کر یہ پروپیگنڈا شروع کردیا کہ امریکہ نے سات مارچ کو انہیں دھمکی دی اور اسی ٹیلی گرام میں یہ بات بھی ہےکہ عدم اعتماد کی تحریک امریکہ کے ایما پر لائی جارہی ہے۔

 اس دعوے سے سیکورٹی اسٹیبلشمنٹ اور خود امریکی ہکا بکا رہ گئے۔ وائٹ ہاوس اوراسٹیٹ ڈیپارٹمنٹ نے تردید کردی۔ ملاقات کرنے والے ڈونلڈ لو نے بھی ٹی وی انٹرویو میں کہہ دیا کہ عدم اعتماد یا دھمکی کی کوئی بات نہیں کی۔ سفیر اسد مجید کے ساتھ ملاقات میں موجودہ دوسرے سفارتکار بھی متعلقہ حکام کو بتاچکے ہیں کہ ایسی کوئی بات نہیں ہوئی۔ چنانچہ فیس سیونگ کے لیے عمران خان نے کئی روز بعد قومی سلامتی کمیٹی کا اجلاس بلایا اور اس میں نصف درجن غیرمتعلقہ وزیروں کو بلایا۔ کمیٹی کو اپنی مرضی کی بریفنگ دلوائی۔ پھر پریس ریلیز خود جاری کی 

لیکن پریس ریلیز میں نہ عدم اعتماد کا ذکرہے، نہ امریکہ کا نام ہےاور نہ حکومت گرانے کے لیے سازش کا ذکر عمران اور ان کے گوئبلز نے یہ پروپیگنڈا شروع کیا کہ ان کے دعوے کی سروسز چیفس نے بھی تصدیق کی ہے۔

اس سے بڑا ظلم یہ کیا کہ اس ٹیلی گرام کو بنیاد بنا کر آرٹیکل 5 کی آڑ لے کر انہوں نے ڈپٹی اسپیکر سے عدم اعتماد کی تحریک واپس کرائی اور پھر اسمبلی توڑنے کا اعلان کیا۔ گویا اس ایک ٹیلی گرام کی بنیاد پر انہوں نے ڈپٹی اسپیکر سے ڈیکلیئر کروایا کہ اپوزیشن کے تمام رہنما اور ممبران اسمبلی غیرمحب وطن ہیں۔ اب یہ ضروری ہوگیا ہے کہ اس ٹیلی گرام کی حقیقت واضح کی جائے کیونکہ اپوزیشن کو غیرمحب وطن قرار دینے، پھر اس کی آڑ میں عدم اعتماد پر ووٹنگ کی بجائے آئین شکنی کرکے اجلاس ملتوی کرنے اور پھر اسی کی آڑ میں اسمبلی توڑنے جیسے سارے افعال کی عمارت اس ٹیلی گرام پر کھڑی ہے۔

 پاکستان خارجہ محاذ پر مذاق بن گیا"

آئیندہ الیکشن اور تشکیل حکومت کا منظرنامہ ایمپائر کے نیوٹرل رہنے سے مشروط ہے ورنہ نتائج کچھ بھی ہو سکتے ہیں۔ مقابلہ تو نام ہی فیئرپلے کا ہے جو پاکستان میں ہمیں کم ہی نظر آیا ہے۔ اور ابھی بائیڈن/ ڈیموکریٹک پارٹی کے بھی تین سال باقی ہیں اور آنے والا اسٹیبلشمنٹ کا باس بھی تین سال ہی اپنی پالیسیاں تشکیل دے گا لیکن جس بات کی سمجھ عمران خان کو نہیں آ رہی وہ یہ ہے کہ جو انہیں اس مقام پر لے آئے کیا وہ انہیں دوبارہ وہیں دیکھنا چاہیں گے ؟ عدلیہ جو اتنا ٹائم ایک چھوٹا سا نقطہ جو ہر پھٹے والے وکیل کو بھی معلوم ہے کہ "بغیر دوسرے فریق کو سنے کوئی فیصلہ نہیں دیا جا سکتا" کیا سپریم کورٹ کے ججز کے علم میں نہیں ؟ وہ دراصل یہ ٹائم اس لئے لے رہے ہیں کہ اسٹیبلشمنٹ یکسو ہوسکے جو وہ اس وقت نہیں ہے 

اللہ اس ملک کے باسیوں کیلئے رحمت کے دروازے کھولے اور لیڈران کرام کو عقل سلیم عطا فرمائے 

آمین

مغربی حکومتوں کی منافقت

 سلامتی کونسل میں مختلف مندوبین کا موقف

یورپی یونین کے مندوب اولاف سکوگ نے کہا کہ یہ قرارداد صرف یوکرین سے متعلق نہیں تھی بلکہ یہ عالمی سرحدوں کے دفاع سے معلق ہے۔

شام نے مغرب کے دہرے معیار کی مذمت کرتے ہوئے کہا کہ مغربی ممالک نے خود حالیہ دہائیوں میں لیبیا، عراق اور افغانستان میں مداخلت کی ہے

xX------------Xx-----------Xx

یوکرین پر حملہ کرنے پر روس کو سزا دینے کیلئے مغربی ممالک نے سخت موقف اختیار کیا ہے تاہم اس اقدام کی وجہ سے منافقت کا اعلیٰ معیار بے نقاب ہوگیا ہے کیونکہ امریکا نے جتنے ملکوں پر حملہ کیا ہے اس پر کبھی بھی اس کیخلاف سخت ترین پابندیاں عائد نہیں کی گئیں۔

 یوکرین میں اگر موجودہ حالات نے کچھ ثابت کیا ہے تو وہ یہ ہے کہ امریکا اور اس کے بین البراعظمیٰ ساتھیوں نے افغانستان، عراق، لیبیا اور شام پر ظلم و جبر اور بے رحمی کے ساتھ قبضہ کیا۔ اسی دوران، روس اور ولادیمیر پیوٹن کو یوکرین میں اقدامات کی وجہ سے مرکزی دھارے کا تقریباً پورا میڈیا نازی جرمنی سے تشبیہہ دے رہا ہے۔

غیر ملکی میڈیا میں شائع ہونے والے اداریے میں کہا گیا ہے کہ سب سے پہلے تو یہ واضح ہونا چاہئے کہ منافقت اور عیاری کسی بھی ملک کو کسی دوسرے ملک کیخلاف حملوں کا جواز نہیں دیتی۔

 بہ الفاظ دیگر، چونکہ نیٹو ممالک 2001ء سے دنیا کے مختلف ملکوں پر حملے کرکے تباہی پھیلاتے رہے ہیں اسلئے روس کو بھی ایسا ہی کرنے کا جواز نہیں ملتا۔ کسی بھی ملک کے پاس طاقت کے استعمال کیلئے ٹھوس جواز ہونا چاہئے لہٰذا سوال یہ پیدا ہوتا ہے کہ کیا روس کے اقدامات کو منصفانہ کہا جا سکتا ہے یا کیا یہ کارروائی قابل فہم ہے؟ اس سوال کا جواب قارئین خود دیں گے۔ لوگوں کو یہ جان کر حیرت ہوگی کہ روس نیٹو کو توسیع پسندانہ عزائم کے حوالے سے گزشتہ ایک دہائی سے خبردار کرتا رہا ہے۔

 2007ء میں میونخ سیکورٹی کانفرنس میں روسی صدر نے واضح طور پر وہاں موجود طاقتور ممالک سے سوال کیا تھا کہ روس کی سرحدوں پر عسکری انفرا اسٹرکچر لگانے کی آخر ضرورت کیا ہے، کیا کسی کے پاس اس سوال کا جواب ہے؟ بعد میں اپنے خطاب میں انہوں نے کہا کہ روسی سرحد پر عسکری اثاثہ جات جمع کرنا کسی بھی طرح سے انفرادی ریاستوں کا جمہوری فیصلہ نہیں ہو سکتا۔

 روسی صدر کی آواز پر کسی نے دھیان نہیں دیا اور نیٹو نے چار ممالک (البانیہ، کروشیا، مونٹی نیگرو اور شمالی مقدونیہ) کو رکنیت دیدی۔ تصور کریں کہ امریکا کو کتنی مرچیں لگتیں جب روس بھی ایسا ہی توسیع پسندانہ اقدام کرتے ہوئے جنوبی امریکی ریاستوں کو اپنا حصہ بنانا شروع کردے۔

روس کیلئے سب سے پریشان کن وقت وہ تھا جب امریکا اور نیٹو نے یوکرین میں جدید ترین اسلحہ جمع کرکے وہاں انبار لگا دیا اور یوکرین کو شہ دی کہ وہ نیٹو کی رکنیت حاصل کرے۔ یہی وہ وقت تھا جب یوکرین سے روس کو اپنی بقاء کا خطرہ لاحق ہوگیا۔

 دسمبر 2021ء میں جب صبر کا پیمانہ لبریز ہوگیا تو روس نے سیکورٹی کی ضمانت کیلئے ایک معاہدہ امریکا اور نیٹو ممالک کو پیش کیا جس میں مطالبہ کیا گیا تھا کہ مشرق کی جانب نیٹو کی توسیع روک دی جائے اور یوکرین سمیت دیگر ممالک کو نیٹو کی رکنیت نہ دی جائے۔

اس دستاویز میں یہ بھی مطالبہ کیا گیا تھا کہ نیٹو یوکرین سمیت مشرق کی جانب دیگر ریاستوں اور وسط ایشیائی ریاستوں میں کوئی فوجی مشقیں یا دیگر سرگرمیاں نہیں کرے گا۔ ایک مرتبہ پھر روس کی تجاویز کو تکبر کی نگاہ سے مسترد کر دیاگیا۔ اگرچہ لوگوں کی نظر میں روس کی کارروائی حیران کن اور ناقابل قبول ہو سکتی ہے لیکن یہ نہیں کہا جا سکتا کہ روس نے خبردار نہیں کیا تھا کیونکہ ایسا نہیں ہے کہ 24؍ فروری کو صبح کو روس نیند سے جاگا اور اٹھ کر یوکرین پر حملہ کر دیا۔

اگر روس نے غلط کیا تو امریکا اور اس کے اتحادی ممالک گزشتہ دو دہائیوں سے کیا کرتے رہے ہیں؟ مثال کے طور پر عراق جنگ کو ہی دیکھ لیں، عراق پر حملے کے بعد کے نتائج میں مغربی میڈیا خود اعتراف کرتا ہے کہ یہ جنگ انٹیلی جنس اطلاع کی ناکامی کا نتیجہ تھی، امریکا اور اتحادیوں نے بلا اشتعال عراق پر چڑھائی کر دی۔

 9/11 کے حملے کے بعد امریکا نے براہِ راست صدام حسین پر الزام عائد کردیا کہ اس کے پاس وسیع تباہی پھیلانے والے ہتھیار ہیں۔ جس وقت امریکا اور اقوام متحدہ کے ماہرین اس الزام کی تصدیق کیلئے عراقی سرزمین پر موجود تھے ٹھیک اسی وقت امریکا، برطانیہ، آسٹریلیا اور پولینڈ نے 19؍ مارچ 2003ء کو عراق پر تباہ کن حملہ شروع کر دیا۔ قلیل عرصہ میں امریکا اور اس کے ساتھیوں نے دس لاکھ معصوم عراقیوں زخمی کیا، بے گھر کیا اور لاکھوں کو موت کے گھاٹ اتار دیا۔

 کیا یہ بین الاقوامی قانون کی خلاف ورزی نہیں تھی؟ سینٹر فار پبلک انٹیگریٹی نے اپنی رپورٹ میں بتایا تھا کہ بش انتظامیہ نے عوام میں اپنی گرتی ساکھ کو بچانے کیلئے 2001ء سے 2003ء کے درمیان میڈیا میں 900؍ جھوٹ بولے اور یہ راگ الاپا کہ عراق سے امریکا اور اس کے شراکت دار ممالک کو خطرہ ہے۔

لیکن وہی مغربی میڈیا جو آج روسی جنگ کو انسانی حقوق کی خلاف ورزی قرار دیتا ہے اسے عراقی زمین پر امریکی بوٹ اور عراقیوں کے خون میں کوئی انسانی حقوق نظر نہیں آئے۔ چونکہ فرانس نے عراق جنگ کی مخالفت کی تھی اسلئے امریکی سیاست دانوں نے غرور اور تکبر میں فرانسیسی شراب اور پانی کی بوتلوں کے بائیکاٹ کا اعلان کیا تھا۔

اب اس تمام تر صورتحال کا یوکرین کی موجودہ صورتحال کے ساتھ تقابل کریں جہاں اصولوں کے ترازو میں پلڑا روس کیخلاف ہے اور برسوں سے خدشات کے اظہار کے باوجود روس کے تحفظات دور نہ کیے جانے پر بھی کیا روس کو یہ اقدام کرنے کا جواز نہیں تھا؟ قارئین چاہے کچھ بھی سوچیں لیکن روس کیخلاف اس قدر شدید پابندیاں برسوں سے پابندیاں عائد کرنے کے باوجود عائد کی گئی ہیں تو امریکا اور مغرب کی منافقت پر ان کیخلاف کوئی پابندی کیوں نہیں عائد ہوئی؟

روسی افراد اور روسی معیشت کیخلاف پابندیاں عائد کرنے کے علاوہ، فرانس کے وزیر معیشت کا بیان بڑا ہی دلچسپ ہے کہ فرانس روس کیخلاف مکمل معاشی اور مالیاتی جنگ کیلئے پر عزم ہے۔ پوری کوشش کی جا رہی ہے کہ روسی میڈیا اور اصل خبروں کا بائیکاٹ کیا جا رہا ہے کیونکہ ان خبروں کے ذریعے مغربی ممالک کو اصل صورتحال کا پتہ چل سکتا ہے۔